«Nur Otan» partııasy oblystyq fılıalynda etnomádenı birlestikter jetekshileri men ókilderi qatysýymen ótken dóńgelek ústelde osyndaı usynys jasaldy.
Mundaı pikir bildirgen «Daǵystan» etnomádenı birlestiginiń tóraǵasy Ramaz Shıranovtyń aıtýynsha, mektepterde, orta býyn oqý oryndarynda Qazaqstan halqy Assambleıasy úlgisinde uıym qurýdyń mańyzy zor. Sonda jetkinshekterdiń ózderiniń qyzmetin esh kedergisiz, eshkimniń aralasýynsyz-aq belsendi júrgizýine múmkindik ashylyp, bul óz kezeginde dostyq pen baýyrmaldyqqa erte bastan baýlýǵa úlken yqpal eter edi. R.Shıranovtyń usynysy jyly qabyldandy.
Kishi assambleıanyń bir shańyraq astynda ómir súrip jatqan san ult órenderiniń patrıottyq, otanshyldyq sezimin kóterý, ortaq rýhanı baılyqty baǵalaý, ulttyq salt-dástúrlerdi saqtaý, ana tildi aıalaý sııaqty ıgi is-sharalarǵa uıytqy bolatyny taǵy anyq. Qazaqstan halqy Assambleıasynyń ulttar men ulystar arasyndaǵy tatýlyq pen túsinistikti biriktirýde róli úlken ekenine kóz jetýine oraı qoǵamdaǵy yntymaqtastyq mádenıetin jas urpaq boıyna sińirip, azamattyq ustanym qalyptastyrýda jetkinshekter úshin úırener úlgi bary ataldy.
Sóıtip, mektepter janynan kishi assambleıalar quryla bastaıtyn boldy.
Aıqyn NESIPBAI,
«Egemen Qazaqstan».
QARAǴANDY.