Ýkraına prezıdenti Vladımır Zelenskıı eldegi jaǵdaıǵa baılanysty alańdaýshylyq bildirip, Batys elderiniń kómegine áli de kóńili tolmaıtynyn jetkizdi.
V.Zelenskıı Ýkraınadaǵy beıbit turǵyndardyń ólimine ishinara Batys elderi de kináli degen pikir bildirdi. Onyń aıtýynsha, Ýkraına soǵysty aıaqtaý úshin jetkilikti qarý-jaraq alyp jatqan joq. «Ýaqyt joǵaltyp jatyrmyz. Ýkraındyqtardyń ómiri qıylyp jatyr. Bul – Ýkraınaǵa kerek qarý-jaraqty áli de arsenalynda saqtap otyrǵandardyń jaýapkershiligi», dedi V.Zelenskıı.
Ol sondaı-aq Reseı áskeri Ýkraınada hımııalyq qarý qoldanýy múmkin dep habarlady. Alaıda dúısenbide jasaǵan halyqqa úndeýinde bul qarýdy qoldanǵany týraly aqparat bermegen. Degenmen Reseı tarapynan aıtylǵan kez kelgen qaýipti asa saqtyqpen qaraıtynyn aıtqan.
О́tken aptada Eýropa kóshbasshylarynyń Ýkraına men Reseıge sapary jıileı tústi. Ýkraınaǵa Eýrokomıssııa basshysy Ýrsýla fon der Lıaıen, Ulybrıtanııa premer-mınıstri Borıs Djonson saparmen barsa, Reseıge Aýstrııa kansleri Karl Nehammer baryp qaıtty. Ol V.Pýtınmen áńgime ashyq, týra ári qatal bolǵanyn aıtty. Aýstrııa Syrtqy ister mınıstrligi bul sapar Germanııa kansleri, Túrkııa prezıdenti, Eýropalyq Komıssııa jáne Eýropalyq Keńes basshylarymen aldyn ala kelisilgenin málimdedi. Kezdesý týraly Ýkraına prezıdenti de habardar bolǵan, Máskeýge ushpas buryn ol Kıevte boldy. Aýstrııa kansleri baspasózge bergen suhbatynda Pýtınmen jeke kelissózderdiń mańyzdylyǵyn birneshe ret atap ótti.
K.Nehammer men V.Pýtınniń bir jarym saǵatqa sozylǵan kezdesýi jabyq formatta, hattamasyz jáne baspasózge arnalǵan qorytyndy málimdemesiz ótken. Ol «Reseı prezıdenti V.Pýtınge soǵystyń aıaqtalýy keregin, munda eki jaqtan da jeńilis tapqandar ǵana bolatynyn jetkizdim», dep atap ótti.
Reseı bul aıyptaýlardyń barlyǵyn joqqa shyǵaryp otyr. El prezıdenti V.Pýtın: «Ýkraınada etek jaıǵan Reseıge qarsy kúshtermen qaqtyǵys bir bolary sózsiz edi, bul tek ýaqyt máselesi boldy», dep málimdedi. «Bizde basqa tańdaý bolmaǵany anyq, bul durys. Arnaıy operasııa maqsatyna qol jetkizetinine kúmán joq», dedi ol. Bul málimdemeni ol Amýr oblysyna sapary barysynda aıtty.
Reseı men Belarýs prezıdentteri Vladımır Pýtın men Aleksandr Lýkashenko seısenbide, Ǵaryshkerler kúni Amýr oblysyndaǵy Vostochnyı ǵarysh aılaǵynyń qurylysymen tanysyp qaıtty. Osyǵan deıin Belarýs prezıdenti Ýkraına-Reseı arasyndaǵy kelissózde syrt qalmaıtynyn habarlaǵan edi. Osy málimdemeden keıin Reseıdiń syrtqy ister mınıstri S.Lavrov: «Belarýs Ýkraına qaýipsizdigine kepil bolatyn elderdiń tiziminde bolýy kerek», dedi.
Al Batys elderi burynǵydaı Reseı áreketin aıyptap, qaqtyǵysty doǵarýdy talap etip otyr. Eýropa elderi Reseı áskeri basyp alǵan qalalardaǵy jantúrshigerlik kórinisten keıin reseılik dıplomattardy elden shyǵarý týraly sheshim qabyldap jatyr. Reseıdiń Fransııadaǵy elshiligi fransýz bıligi alty dıplomatty elden shyǵarý týraly sheshim qabyldaǵanyn rastap, jaýaptyń kóp kúttirmeıtinin habarlady.
Býchadan bólek Reseı áskeri baqylaýynda bolǵan ózge de qalalardaǵy jaǵdaı aýyr degen aqparat bar. Máselen, Marıýpol qalasynyń basshysy Associated Press-ke bergen suhbatynda 10 myńnan astam beıbit turǵyn qaıtys bolǵanyn aıtqan. Al BUU Balalar agenttigi 5 mıllıonǵa jýyq bala, ıaǵnı eldegi balalardyń úshten ekisi alty aptada úıin tastap ketkenin málimdedi. IýNISEF-tiń Tótenshe jaǵdaılar jónindegi baǵdarlamalarynyń dırektory Manýel Fonteınniń aıtýynsha, Ýkraınanyń 7,5 mıllıon balasynyń 4,8 mıllıony osyndaı qysqa merzimde kóshirilgen. Ol 31 jyldyq gýmanıtarlyq jumys tájirıbesinde mundaı jyldam kóshti kórmegenin aıtady.