Dúnıejúzilik densaýlyq kúnine oraı oblys ortalyǵyndaǵy Táýelsizdik alańyna júzdegen belsendi jastar shyǵyp, jattyǵý jasady. О́mirde kezdesetin tosyn jaılarǵa tap bolǵanda tyǵyryqtan shyǵýǵa qajetti alǵashqy medısınalyq kómek qalaı jasalý kerektigin úırendi.
Tańsáriden kópshilik kóńilin ózine aýdarǵan, buryn kóz úırenbegen mazmundy is-sharaǵa oblystyq sporttyq karate federasııasynyń prezıdenti Rýslan Dúkenbaev jetekshilik jasady. Shıraq qımyldy, júzderinen sportqa degen yntalary aıqyn baıqalatyn jastardyń jigerli qımyly qarap turǵan kisiniń kóńiline densaýlyqty qalaı saqtaýǵa, túzeýge, nyǵaıtýǵa bolatyndyǵy týraly kóp oı salady eken.
– Kúnde tańerteń jumysqa qalalyq park arqyly ótip bara jatyp, egde adamdardyń shama-sharqynsha jattyǵý jasap jatqanyn kórip, kóńilim súısinedi, – deıdi oblystyq jastar resýrstyq ortalyǵy janyndaǵy eriktilerdi qoldaý ortalyǵynyń jetekshisi Dastan Ermekov, – álemniń kóptegen jerinde mundaı kórinisti jıi kórýge bolady. Bul ómirge degen oń kózqaras, myqty densaýlyqqa degen umtylys ári adamnyń sarqylmaıtyn erik-jigeriniń kórinisi. Negizi salamatty ómir saltyna kóbirek mán berýimiz kerek. Sondyqtan, búgingi sharany uıymdastyrý barysynda ózimizdiń is-áreketimiz arqyly qala turǵyndarynyń nazaryn aýdarǵymyz keldi. Bizdiń bul bastamamyzdy estip-bilgennen keıin óńirdiń kóptegen adamdary qoldaıdy dep úmittenemiz.
Shynynda da bul adamnyń ózine qajetti qareket. Jastardyń jalyndy bastamasy eńbektegen baladan eńkeıgen kárige deıin áser etip, oı salýy ábden múmkin. Ári bir qadap aıta ketetini, buqaralyq sportpen aınalysý bir kúndik is emes, udaıy ári turaqty óristetilgeni jón. Rýslan Dúkenbaev búgingideı aksııanyń áseri bolaryna nyq senimdi. Ulttyń densaýlyǵy saıyp kelgende ár azamattyń aǵzasynyń saýlyǵyna baılanysty. Al ol jiti kóńil aýdarǵanda ǵana múmkin bolatyn dúnıe.
Barshasy bir adamdaı jattyǵý jasaǵannan keıin kóktemniń shýaqty kúninde aksııaǵa qatysýshylar alǵashqy medısınalyq kómek kórsetý ádisterimen tanysyp, ony ózderi de meńgerýge mashyqtandy.
– Eger oqyp, úırenip, halyqaralyq sertıfıkat alǵylaryńyz kelse, bizdiń keńsege kelińizder, – dedi halyqaralyq dárejedegi nusqaýshy Rýslan Kabıdýlınov, – bilgenniń artyǵy bolmaıdy.
Jastar jaǵy trenıngke belsene qatysty. Olardyń árqaısysy ózderin qutqarýshylardyń ornyna qoıyp, qaterli shaqta qalaı is-qımyl jasaý kerek ekenin kóńilderine toqyp aldy. Mazmuny mol is-shara ortalyq parktegi sport alańynda jalǵasty. Belsendi jastardyń árqıly mazmuny mol oıdy meńzeıtin is-sharasyna Qazaqstan stýdentteri alıansynyń belsendileri muryndyq boldy. Olar barlyq sharany múltiksiz atqaryp bolǵannan keıin jaqsy joralǵy bolǵan isteriniń sońyn qorytyndylap, estelik sýretke tústi.
KО́KShETAÝ