Memleket basshysy Nur-Sultan qalasynyń ákimi Altaı Kólginovti qabyldady, dep habarlaıdy Egemen.kz.
Qasym-Jomart Toqaevqa bıylǵy birinshi toqsannyń qorytyndysy boıynsha elordanyń áleýmettik-ekonomıkalyq jáne ınfraqurylymdyq damýy jóninde esep berildi.
Elorda ákimdigi Prezıdenttiń tapsyrmasy boıynsha áleýmettik nysandar salý, turǵyn úıler alabyn damytý, shaǵyn jáne orta bıznesti qoldaý, qurylysy uzaqqa sozylǵan nysandardyń jumysyn aıaqtaý, jekemenshik sektordan ınvestısııa tartý jóninde júıeli jumystar júrgizip jatyr. Atap aıtqanda, bıylǵy úsh aı ishinde 600 myń sharshy metrden astam turǵyn úı paıdalanýǵa berilgen. Qala ekonomıkasyna 154 mıllıard teńgeden astam qarjy tartylǵan. Jekemenshik sektordan ınvestısııa tartý kólemi byltyrǵy jyldyń osy kezeńimen salystyrǵanda 4,3 paıyzǵa ósken. 2021 jyly 1,2 trıllıon teńgeden astam qarjy tartylǵan.
Memleket basshysyna sorǵy-súzgish stansııasynyń (SSS-3) qurylysy, nóser kárizderi, kárizdik tazartý qurylystaryn (KTQ-2) jobalaý, gazdy qazandyqtar men basqa da nysandar týraly málimet berildi.
Budan bólek Altaı Kólginov Qasym-Jomart Toqaevqa bıyl 200-den astam aýla men qoǵamdyq oryndarǵa (baqtar, saıabaqtar men býlvarlar) abattandyrý jumystary júrgiziletini jóninde aıtty.
Prezıdent qala jurtshylyǵynyń pikirin eskere otyryp, elordany josparly túrde odan ári damytý jáne abattandyrý jumystaryn jalǵastyrýdy tapsyrdy.