Sokolov-Sarybaı taý-ken baıytý óndiristik birlestiginiń shekemtas óndirý sehyndaǵy eki kúıdirý mashınasy jańǵyrtylyp, qaıta iske qosyldy. Jabdyqtyń jumysy 6 aı toqtap turǵan bolatyn. Qalpyna keltirý jumystaryna 1 jyl ketti. Jobaǵa jumsalǵan ınvestısııa kólemi shamamen 3 mlrd teńgege teń.
Shekemtas óndirý sehynda buryn 8 kúıdirý mashınasy bar bolsa, endi olardyń sany 10-ǵa jetip otyr. Jańǵyrtý jumystary qos jabdyqtyń jumys qýatyn qalpyna keltirip, ónimdiligin arttyrypty. Atqarylǵan jumys kólemi aýqymdy. Qalpyna keltirý baǵdarlamasy №9 jáne №10 kúıdirý mashınalaryn ǵana emes, sonymen qatar iske qosylǵan kúıdirý, kúıdirý-suryptaý tehnologııalyq ýchaskelerin de qamtypty. Jalpy, jóndeý jumystary qurylys, mehanıkalyq jáne elektr baǵyttarynda júrgen.
– Jabdyqtyń tehnıkalyq jaı-kúıi ónimdilikke tikeleı áser etedi. Jóndelgen kúıdirý mashınalary saǵatyna shamamen 93 tonna kúıdirilgen shekemtas óndiretin boldy. Konservasııadan buryn atalǵan kórsetkish 84 tonnadan aspaıtyn. Jabdyqty jóndeý negizgi tehnologııalyq jáne qosalqy jabdyqtarda qatar júrgizildi. Jańa elektr qozǵaltqyshtary, órt sóndirgishter men tartqysh qondyrǵylardyń jetekterin iske qosý jáne basqarý júıeleri ornatylǵan. Joǵary voltty jeli tolyǵymen aýystyryldy. Qazir mashınanyń ónimidiligi joǵary, shyǵyny tómen. Jaqsy jumys istep tur, – deıdi О́nerkásip kesheni tehnıkalyq bóliminiń jylý-tehnıka ınjeneri Maksım Karev.
Qaıta qurý óndiristik alańdardyń jaryqtandyrý júıesine de áser etipti. Qyzmetkerler júretin joldarǵa qýat únemdeıtin shamdar ornatylǵan. Keńistik neǵurlym jaryq bolsa, soǵurlym qaýipsiz jáne qyzmetkerlerdiń densaýlyǵyna zııan keltirmeıdi. Jańǵyrtý jolyndaǵy taǵy bir qadam – kúıdirý mashınasynyń jumysy kezinde adamı faktordy azaıtatyn tehnologııalyq prosesti basqarýdyń avtomattandyrylǵan júıesin engizý. Barlyq prosess parametrleri bar kúıdirý mashınasynyń «Jandy modeli» operator bólmesinde ornatylǵan kompıýter monıtorynda usynylǵan. Júıe birlestiktiń óndiristik jaǵdaılaryna beıimdelgen jáne kúıdirý mashınasy jabdyqtarynyń barlyq kesheniniń jumysyn turaqtandyrýǵa baǵyttalǵan.
– Basqarý pýltiniń operatorlary táýlik boıy jumys isteıdi. Olardyń basty mindeti – baqylaý-ólsheý aspaptarynyń kómegimen temir keni shekemtastaryn kúıdirý. Tehnologııalyq prosestegi negizgi parametrlerden aýytqý kezinde operator olardy joıý úshin jedel sharalar qabyldaıdy. Tutynýshylardyń talaptaryn qanaǵattandyratyn sapaly shekemtas shyǵarý – Sokolov-Sarybaı taý-ken baıytý óndiristik birlestigindegi shekemtas óndirý sehynyń negizgi mindeti. Kúıdirý mashınalaryn kúrdeli jóndeý ónimderimizdiń básekege qabilettiligin arttyrýǵa sep bolady. Sondyqtan kásiporyn shyǵarylatyn ónimniń ózindik qunyn tómendetýge, negizgi tehnologııalyq jabdyqtyń ónimdiligin arttyrýǵa jáne eńbek jaǵdaılaryn jaqsartýǵa baǵyttalǵan jobalarǵa turaqty ınvestısııa quıyp keledi, – deıdi Maksım Karev.