Rýhanı azyqtyń ýyzy

Áleýmettik jeliniń baǵy janyp tur degenimizben, gazet-jýrnalǵa degen el yqylasy sýymaǵan eken. Kózimizben kórip, kóńilimiz toǵaıdy. Is-sharaǵa qatysqan qaýym ishinde, ásirese aǵa býynnyń qatary mol. Respýblıkalyq basylymdardan bastap, oblystyq, qalalyq merzimdik basylymdar týraly, olarda úzdiksiz jarııalanyp jatqan, oqyrmandardyń rýhanı jan-dúnıesine telegeı-teńiz nár beretin materıaldar haqynda, jalpy, ár basylymnyń ustanymy, aldyna qoıǵan asqaraly mindeti, bet alysy, kózdegen kókjıegi, qaýzaǵan dúnıesi týraly kesek-kesek oı aıtyldy. Osy joldardyń avtory, júz jyldyq tarıhy bar el gazeti – «Egemenniń» búgingi baǵyty týraly sóz ónerin qadir tutatyn qaýymǵa egjeı-tegjeı túsindirip, taratyp aıtyp berdi.

Bizdiń sózimizdi tiriltken el aqsa­qal­dary­nyń biri, baıyrǵy jýrnalıst Saılaý Kóshkenov bas basylymda jarııa­lan­yp jat­qan tolǵamdy taqyryptardy qam­tıtyn tarıhı materıaldardyń, ýaqyt tozańy tumshalaǵan shańynan arshyp alyp, Alash balasynyń túpki tarıhyna qatysty túgel sózdiń tórkinin sıpattaıtyn tamasha dúnıelerdi mysal ete otyryp, óz oıyn bildirdi. Jyl basynda jazylýǵa múmkindigi bolmaı qalǵandar óz ókinishterin de aıtyp, osy jartyjyldyqtan bastap jazylǵaly kelgendikterin jetkizip jatty. Yqylastaryna qaraǵanda, bas basylymǵa jáne ózge de buqaralyq aqparat quraldaryna degen oń kózqaras bar eken. Jazǵan sózimizdiń dittegen jerine jetetindigin túısingen saıyn kóńil ósip, qalamyńdy qushyrlana siltegiń keledi.

«О́tken jyldyń sońynda qarjy tapshy­lyǵyna baılanysty jazyla almap edik, – dedi oblys ortalyǵyndaǵy joǵary oqý ornynyń basshysy. – Bıyl náýbet jyl­daryndaǵy el basynan keshirgen alapat oqıǵany sıpattaıtyn bir materıaldy izdep, qanshama áýre boldyq. Endi ýaqytynda jaz­dyryp alýǵa umtylyp otyrmyz».

«Egemenniń» el izdep júrip oqıtyn basylym ekendigin osy bir jalǵyz aýyz sózden ańǵarýǵa bolady. Ári búgingi baǵyty kópshiliktiń kókeıindegi suranysty dóp basyp otyr.

Jıyn barysynda jergilikti gazet-jýr­naldarǵa tegin jazylý uıymdastyrylyp, lotereıa oınatyldy. Respýblıkalyq «Kazah­stanskaıa pravda» gazetiniń tórt syılyǵy utys oıyndarynda baǵy janǵan oblystyń ár túkpirinde turatyn jazdyryp alýshylarǵa jóneltildi. Sybaǵaly syı­lyqtyń ishinde yqsham, ádemi qolsómke de bar. Syrtyna basylymnyń ataýy jazylypty. Kádimgideı kóztar­tarlyq. Qolyna ustap júrgen adam jaıaý júrip jarnama jasap bara jatatyndaı. Eń bastysy, el yqylasy eskerildi. Basylym men oqyrman arasyndaǵy názik baılanystyń arqaýyn bekite túskendeı.

«О́tken jylǵy basylymdarǵa jazylý naýqany aýyrlaý ótti, – deıdi «Qaz­posh­ta» aksıonerlik qoǵamynyń oblys­tyq fı­lıalynyń basshysy Qaırat Bekenov. – Biraq biz basylymnyń ókil­derimen birlese otyryp, biraz jumys istedik. Qalaı bolǵan kúnde de adamdar gazet oqýy kerek qoı. Qazir shalǵaıdaǵy shaǵyn aýyldardaǵy poshta jumysyn jandandyrýǵa kúsh salyp jatyrmyz. Poshta qyzmetkerleriniń eńbekaqysy da ósti».

Kóp bolyp ılegen bir teriniń push­paǵy kózdegen maqsatyna jetse, zaman­das­tarymyzdyń rýhanı álemin jarqyratatyn, nárlendiretin azyqtyń ýyzy molaıa túspek.

Kókshetaý