Pandemııaǵa qarsy shekteý sharalary kezinde jabylyp qalǵan Qostanaıdaǵy Antikor ortalygy qaıta jumys isteı bastady. Servıstik ortalyq birinshi jumys kúnin ashyq esik kúni dep jarııalap, jastarǵa arnalǵan trenıngter men ashyq ári tıimdi memleket qaǵıdattaryn júzege asyrý máseleleri boıynsha konferensııa ótkizdi.
Is-shara barysynda oblystyq sybaılas jemqorlyqqa qarsy is-qımyl departamentiniń basshysy Serikjan Myrzaly qala turǵyndaryn qabyldady.
«Antikor ortalyǵy buǵan deıin óz qyzmetin onlaın-formatta júzege asyryp keldi. О́ńirde epıdahýaldyń turaqtanýyna baılanysty búginnen bastap azamattardy tikeleı qabyldaıtyn bolamyz. Servıstik ortalyqta Sybaılas jemqorlyqqa qarsy qyzmet mamandary, zańgerler men qoǵamdyq uıymdardyń ókilderi jumys isteıtin bolady. Endi memlekettik organdar tarapynan qysym kórgen kásipkerler men quqyqtyq kómek kerek qarapaıym qala turǵyndary osy ortalyqqa kelip júgine alady», dedi departament basshysy.
Ortalyqqa kelgen azamattarǵa keńes berip, olardyń shaǵymdaryn qarastyratyn, máseleleriniń sheshilý joldaryn izdestiretin is júrgizý ofıseri deıtin mamandar jumys isteıdi. Antikor ortalyǵy aldaǵy ýaqytta maqsatty toptarǵa arnalǵan túsindirý jáne bilim berý is-sharalaryn uıymdastyryp, úkimettik emes mekemelerdiń qyzmetkerlerine arnalǵan trenıngter, memlekettik organdardyń eńbek ujymdarymen kezdesýler ótkizýdi josparlap otyr.
«Búgin sizder servıstik ortalyq jumysynyń qanshalyqty ashyq ekenine kóz jetkizetin bolasyzdar. Munda barlyq azamat úshin meılinshe qolaıly jaǵdaı jasalǵan. Jalpy, «Antıkor ortalyǵy» jemqorlyqty jazalaýdan góri, qaýipti qoǵamdyq indettiń aldyn alý máselelerine kóbirek kóńil aýdaratyn bolady», dedi departamenttiń ardagerler keńesiniń ókili Amantaı Esimov.
Qostanaı oblysy