Bıyl jazda Majarstannyń Býdapesht qalasynda sý sportynan ótetin álem chempıonatynda Qazaqstannyń vaterpolshylary kimdermen kezdesetini belgili boldy.
Elimizdiń erler quramasy D tobynda óner kórsetedi. Qarsylastarymyz – AQSh, Aýstralııa jáne Serbııa. Osylardyń arasyndaǵy eń myqtysy serbter ekeni sózsiz. Olar sońǵy bes Olımpııa oıyndarynyń barlyǵynan oljaly oraldy. 2004 jyly Afınada kúmis, 2008 jyly Beıjiń men 2012 jyly Londonda qola alsa, 2016 jyly Rıo-de-Janeıro men 2021 jyly Tokıoda top jardy. Álem chempıonatynda eki márte dara shyǵyp, taǵy birneshe ret júldegerler qatarynan kórindi. AQSh ta óte azýly komanda. Olar Olımpıadada toǵyz ret (1 altyn+4 kúmis+4 qola) jeńis tuǵyryna kóterilip, basqa da baıraqty básekelerde oljaǵa keneldi.
Áıelder arasyndaǵy saıysta S tobyna túsken jerlesterimiz Brazılııa, Aýstralııa jáne Jańa Zelandııamen sheberlik baıqasady. Bul tórttiktiń arasynan jasyl qurlyq ókilderin bóle-jara ataýǵa bolady. Olar Olımpııa oıyndarynda bir altyn jáne eki qola medal oljalaǵan.