Memlekettik apparattyń jumysy bıýrokratııadan arylady

Memlekettik apparatta sheshimder qabyldaýdyń tıimdiligi men jedeldigin arttyrý, atqarýshy bıliktiń qyzmetin zańnamalyq turǵydan artyq reglamentteýdi boldyrmaý, qujat aınalymy men eseptilikti qysqartý, memlekettik organdar basshylarynyń derbestigi men derbes jaýapkershiligin arttyrý maqsatynda QAÝLY ETEMIN:

1. Bıýrokratııadan aryltýdyń mynadaı qaǵıdattary aıqyndalsyn:

1) mánniń nysannan basymdyǵy – nátıjege qol jetkizý boıynsha jumys nysanynan naqty jáne ólshenetin nátıjeniń basym bolýy;

2) bastapqy boıynsha sıfrlandyrý – memlekettik organdardyń azamattarmen, bıznespen jáne bir-birimen sıfrlyq formatta jan-jaqty ózara is-qımyl jasaýynyń basymdyǵy;

3) basqarýshylyq jaýapkershilik – naqty basshynyń quzyreti aıasyna kiretin sheshimderdi qabyldaý men máselelerdi kelisýdi joǵary turǵan deńgeıge jáne alqaly organdarǵa berýge jol berilmeıtini;

4) úzdiksiz jetildirý – memlekettik apparattyń bıýrokratııany qysqartýǵa, júıeli reınjınırıngke jáne ishki rásimder men prosesterdi ońtaılandyrýǵa yntalandyratyn uıymdastyrýshylyq mádenıetin qalyptastyrý jáne qoldaý;

5) reglamentteýdiń ońtaılylyǵy – memlekettik organdardyń qyzmetterin reglamentteýdiń ońtaıly qajetti deńgeıin belgileý, jetkilikti túrde negizdelmegen jańa bıýrokratııalyq talaptardy, eseptilik pen baqylaý túrlerin engizýge jol bermeý.

2. Qazaqstan Respýblıkasynyń Úkimeti ózekti syn-qaterlerge, fors-majorlyq mán-jaılarǵa jáne daǵdarystyq jaǵdaılarǵa jedel den qoıý úshin quzyretterin, fýnksııalary men ókilettikterin zańnamalyq deńgeıde artyq (shamadan tys) naqtylamaı, júktelgen mindetterdi iske asyrý maqsatynda normatıvtik quqyqtyq aktilerdi qabyldaý quqyǵyn memlekettik organdarǵa berýdi, sondaı-aq normatıvtik quqyqtyq aktilerdi, onyń ishinde memlekettik tirkeýsiz qabyldaýdyń erekshe tártibin engizýdi qamtamasyz etsin.

3. Qazaqstan Respýblıkasynyń Úkimeti 2022 jylǵy 1 jeltoqsanǵa deıin Prezıdent janyndaǵy Qazaqstan Respýblıkasyndaǵy sıfrlandyrýdy engizý máseleleri jónindegi komıssııanyń qyzmeti sheńberinde merzimder men kezeńderdi eki esege jalpy qysqartyp, bıýdjet jáne norma túzýshilik prosesteriniń keshendi reınjınırıngin qamtamasyz etsin.

4. Aqparattandyrý salasyndaǵy ýákiletti organ ortalyq jáne jergilikti memlekettik organdarda sıfrlyq transformasııany jáne bıznes-prosesterdiń reınjınırıngin úılestirýge, sondaı-aq memlekettik aqparattandyrý obektileriniń ıntegrasııasy máseleleri boıynsha sheshimder qabyldaýǵa jaýapty bolyp aıqyndalsyn.

5. Memlekettik organdardyń ishki jáne vedomstvoaralyq ózara is-qımyly sheńberinde tıisti memlekettik organdardyń memlekettik aqparattandyrý obektilerinde ornalastyrylǵan aqparatty málimetterdiń anyqtyǵyn, teńtúpnusqalyǵyn jáne ózektiligin qosymsha rastaýsyz paıdalaný qajettiligi aıqyndalsyn.

6. Memlekettik aqparattandyrý obektilerinde ornalastyrylatyn málimetterdiń anyqtyǵy men ózektiligi úshin jáne anyq emes málimetterdi paıdalanýǵa baılanysty shyǵasylar úshin tolyq jaýapkershilik tıisti memlekettik organdardyń basshylaryna júktelsin.

7. Qazaqstan Respýblıkasynyń Úkimeti 2022 jylǵy 31 jeltoqsanǵa deıin Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdarmen birlesip, «Smart Data Ukimet» memlekettik aqparattyq-taldamalyq júıesiniń bazasyndaǵy jáne ózge de memlekettik aqparattandyrý obektilerindegi esepter men kórsetkishterdiń barlyq túrlerin (salalyq derekter) júıelesin.

8. Memlekettik organdardyń «Smart Data Ukimet» memlekettik aqparattyq-taldamalyq júıesindegi jáne ózge de memlekettik aqparattandyrý obektilerindegi qoljetimdi málimetterdi suratýyna jáne berýine, sondaı-aq osyndaı suraý salýlarǵa jaýap berýine tyıym salynsyn.

9. Qazaqstan Respýblıkasy Prezıdentiniń Ákimshiligi úsh aı merzimde:

1) tıisti quqyqtyq aktilerdi qaıta qaraýdy qamtamasyz ete otyryp, ishki bıznes-prosesterge keshendi reınjınırıng júrgizsin;

2) Qazaqstan Respýblıkasynyń Úkimetimen birlesip, Qazaqstan Respýblıkasynyń Prezıdenti men Qazaqstan Respýblıkasy Prezıdentiniń Ákimshiligi basshylyǵynyń qoldanystaǵy baqylaýdaǵy tapsyrmalaryna qosarlanýy jáne ózektiligi turǵysynan jappaı revızııa júrgizsin;

3) qupııalylyq grıfi jáne «qyzmet babynda paıdalaný úshin» degen belgisi bar qujattardy qospaǵanda, Qazaqstan Respýblıkasy Prezıdenti aktileriniń jobalaryn qaǵaz jetkizgishterde engizý, olarǵa vıza qoıý jáne ár paraǵyna qol qoıý jónindegi talapty alyp tastaýdy qamtamasyz etsin.

10. Qazaqstan Respýblıkasynyń Úkimeti:

1) eki aı merzimde: Qazaqstan Respýblıkasy Premer-Mınıstriniń, Qazaqstan Respýblıkasy Premer-Mınıstri orynbasarlarynyń jáne Qazaqstan Respýblıkasy Premer-Mınıstri Keńsesi basshylyǵynyń qoldanystaǵy baqylaýdaǵy tapsyrmalaryna qosarlanýy jáne ózektiligi turǵysynan jappaı revızııa júrgizsin;

Úkimet, ortalyq jáne jergilikti atqarýshy organdar janyndaǵy konsýltatıvtik-keńesshi organdardyń sanyn eki ese qysqartýdy qamtamasyz etsin;

azamattar men bıznes neǵurlym talap etetin ómirlik jáne iskerlik jaǵdaılardy qosyp, olardyń reınjınırıngi men avtomattandyrylýyn qamtamasyz ete otyryp, memlekettik kórsetiletin qyzmetter tizilimin qalyptastyrý tásilderin qaıta qarasyn; azamattarmen kommýnıkasııa jáne vedomstvoaralyq jedel ózara is-qımyl jasaý maqsatynda ashyq keńester ótkizý úshin qoljetimdi onlaın-servısterdi paıdalaný múmkindigin qamtamasyz etsin;

Úkimet Reglamentin jáne basqa da normatıvtik quqyqtyq aktilerdi, onyń ishinde: zańnamalyq aktilerdi, Prezıdenttiń aktilerin, sondaı-aq qupııalylyq grıfi jáne «qyzmet babynda paıdalaný úshin» degen belgisi bar qujattardy qospaǵanda, qujattardy qaǵaz túrinde engizýdiń, olarǵa vıza qoıýdyń jáne ár paraǵyna qol qoıýdyń kúshi joıylýyn;

eger normatıvtik quqyqtyq aktilerdiń jobalary, Parlament depýtattarynyń túzetýlerine jáne olar bastamashylyq jasaǵan zań jobalaryna jáne kelisýdi talap etetin ózge de qujattarǵa Úkimettiń qorytyndylary boıynsha jaýap belgilengen merzimde usynylmasa, olardy «bastapqy boıynsha kelisý» tártibiniń engizilýin; eskertýleri bar normatıvtik quqyqtyq aktilerdiń jobalaryn Premer-Mınıstr Keńsesine engizýge tyıym salýdyń kúshi joıylýyn;

normatıvtik quqyqtyq aktilerdiń jobalaryn kelisý jáne olar boıynsha Premer-Mınıstr nemese onyń orynbasarlary deńgeıinde máseleniń máni boıynsha naqty sheshimder qabyldaý kezinde memlekettik organdar arasyndaǵy kelispeýshilikterdi bes jumys kúni ishinde qaraýdyń mindettiligin;

Úkimettiń jáne basqa da memlekettik organdardyń aıryqsha quzyretine jatatyn qyzmettiń aǵymdaǵy máseleleri boıynsha qujattardy, sondaı-aq memlekettik organdardyń múddeli memlekettik organdarmen aldyn ala pysyqtamaı, máseleni máni boıynsha sheshýdi talap etetin usynystaryn Prezıdent Ákimshiligine engizýge tyıym salýdyń engizilýin;

Prezıdenttiń, Premer-Mınıstrdiń, Memlekettik hatshynyń, Prezıdent Ákimshiligi Basshysynyń jáne Qaýipsizdik Keńesi Hatshysynyń tikeleı tapsyrmalaryn qospaǵanda, oryndalý merzimi eki jumys kúninen az suraý salýlar men tapsyrmalarǵa tyıym salýdyń engizilýin;

Premer-Mınıstr Keńsesinde qujattardy qaraý merzimderiniń eki esege qysqartylýyn;

aktilerdiń jobalaryn jáne keńesterdiń hattamalaryn, suraý salýlar men tapsyrmalardy qaraý quzyretine tikeleı kirmeıtin memlekettik organdarǵa olardy jiberýge, osyndaı qujattardy qaraýsyz qaıtarý múmkindigin bere otyryp, tyıym salýdyń engizilýin;

memlekettik organdardyń birinshi basshylarynyń uıymdastyrýshylyq-tehnıkalyq sıpattaǵy qujattarǵa qol qoıý, sondaı-aq vedomstvoaralyq keńesterge qatysý jáne onda memlekettik organnyń ustanymyn bildirý quqyǵyn memlekettik organdardyń qurylymdyq bólimsheleriniń jekelegen basshylaryna berý múmkindigin;

memlekettik organdardyń birinshi basshylarynyń jetekshilik etetin orynbasarlaryna birinshi basshylardyń sheshimi boıynsha normatıvtik quqyqtyq aktilerdiń jobalaryn kelisý quqyǵy berilýin;

memlekettik organnyń birinshi basshysynyń mindetin atqarýshynyń qolymen budan buryn engizilgen hat-habarǵa memlekettik organnyń birinshi basshysynyń qaıtadan qol qoıýy jáne Premer-Mınıstr Keńsesine engizý jónindegi talaptyń alyp tastalýyn;

ortalyq memlekettik organnyń jańa birinshi basshysynyń taǵaıyndalýyna baılanysty normatıvtik quqyqtyq aktiniń jobasyn qaıta kelisýge tyıym salýdyń engizilýin;

bıliktiń zań shyǵarý jáne sot tarmaqtary organdarymen, Qazaqstan Respýblıkasy Prezıdentiniń Ákimshiligimen hat almasýdy, sondaı-aq Ulttyq arhıv qoryna jatatyn qujattardy qospaǵanda, qyzmettik elektrondyq poshtanyń ortalyq jáne jergilikti atqarýshy organdar úshin kommýnıkasııa men aqparat almasýdyń resmı quraly retinde paıdalanylýyn;

Úkimet otyrystary men Úkimet janyndaǵy konsýltatıvtik-keńesshi organdar otyrystarynyń, sondaı-aq Premer-Mınıstrdiń orynbasarlary men Premer-Mınıstr Keńsesi basshylyǵynyń basqarýymen ótken keńesterdiń hattamalaryn qatysqan memlekettik organdarmen kelisý qajettiligin joıa otyryp, olarǵa qol qoıý merziminiń úsh kúnge deıin qysqartylýyn qamtamasyz ete otyryp, qaıta qarasyn;

2) 2022 jylǵy 31 jeltoqsanǵa deıin: memlekettik aqparattandyrý obektilerinde qamtylǵan azamattar men zańdy tulǵalar týraly málimetterdi túzetýdiń ońaılatylǵan tetigin qamtamasyz etsin; keńse qaǵazyna jáne onymen baılanysty taýarlarǵa arnalǵan bıýdjet shyǵystaryn úsh esege qysqartýdy qamtamasyz etsin;

saqtaý merzimin kórsete otyryp, memlekettik jáne memlekettik emes uıymdardyń qyzmetinde jasalatyn úlgilik qujattardyń tizbesin ońtaılandyrsyn;

memlekettik aqparattandyrý obektilerin qurý jáne (nemese) damytý merziminiń alty aıǵa deıin qysqartylýyn qamtamasyz etsin;

keńesterdi belgileý men ótkizýdiń negizderin naqty reglamentteý boıynsha, onyń ishinde barlyq memlekettik organdar men uıymdar úshin keńesterdi josparlaý men júıeleý jóninde biryńǵaı sıfrlyq sheshimdi engizýdi, sondaı-aq keńesterdi beınekonferensbaılanys jáne qoljetimdi onlaın-servıster arqyly ótkizýdiń basymdyǵyn qamtamasyz ete otyryp, sharalar qabyldasyn;

normatıvtik quqyqtyq aktiler jobalarynyń «Ashyq NQA» ınternet-portalynda ornalastyrylǵany týraly habarlamalardy Qazaqstan Respýblıkasynyń Ulttyq kásipkerler palatasyna, jeke kásipkerlik sýbektileriniń akkredıttelgen birlestikterine, qoǵamdyq keńesterge jiberý rásiminiń avtomattandyrylýyn qamtamasyz etsin;

ortalyq jáne jergilikti atqarýshy memlekettik organdardyń jumysy tıimdiliginiń kórsetkishteri retinde Qazaqstan Respýblıkasy Ulttyq damý josparynyń Strategııalyq kórsetkishter kartasynda bekitilgen dekompozısııalanǵan ındıkatorlardy paıdalana otyryp, olardyń Prezıdent Ákimshiligimen jáne Úkimetpen jasalatyn memorandýmdarynyń ınstıtýtyn, sondaı-aq Premer-Mınıstr men Prezıdent arasynda memorandýmdar jasasý praktıkasyn joısyn;

ortalyq memlekettik organdardyń saıası qyzmetshilerin jáne «A» korpýsynyń ákimshilik qyzmetshilerin memlekettik aqparattandyrý obektilerimen qashyqtan jumys isteýge arnalǵan qurylǵylarmen qamtamasyz etsin; 3) 2023 jylǵy 31 jeltoqsanǵa deıin:

Qazaqstan Respýblıkasynyń Memlekettik qyzmet isteri agenttigimen birlesip, «E-qyzmet» aqparattyq júıesiniń bazasynda memlekettik qyzmetke irikteý jáne qabyldaý prosesin tolyqtaı sıfrlandyrýdy, sondaı-aq ony barlyq memlekettik organdarda engizýdi jáne keńinen taratýdy qamtamasyz etsin;

memlekettik apparattyń bir qujat jobasymen birlesip jumys isteý múmkindigi berile otyryp, qyzmettik hat-habardyń ótýin ońtaılandyrý, tapsyrmalardyń qosarlanýyn boldyrmaý, qujat aınalymy boıynsha taldamalyq esepterdi jedel qalyptastyrý boıynsha sıfrlyq sheshimderi bar biryńǵaı ortalyqtandyrylǵan bultty qujat aınalymyna kóshýin qamtamasyz etsin;

«qyzmet babynda paıdalaný úshin» degen belgisi bar qujattardyń elektrondyq formatqa kóshirilýin qamtamasyz etsin;

«E-zańnama» aqparattyq júıesiniń zań shyǵarý prosesi modýliniń ónerkásiptik paıdalanýǵa engizilýin qamtamasyz etsin;

ortalyq memlekettik organdardyń biryńǵaı býhgalterlik esepke alý aqparattyq júıesiniń engizilýin qamtamasyz etsin;

4) kúntizbelik jyl ishinde «E-Otinish» júıesin jeke jáne zańdy tulǵalar joldanymdarynyń barlyq túrlerin qabyldaý úshin «bir tereze» retinde ınstıtýsııalandyrýdy qamtamasyz etsin.

11. Qazaqstan Respýblıkasynyń Memlekettik qyzmet isteri agenttigi Qazaqstan Respýblıkasynyń Úkimetimen birlesip:

1) memlekettik qyzmetshiler arasynda memlekettik apparat qyzmetin jetildirý jónindegi úzdik jobaǵa arnalǵan konkýrsty jyl saıyn ótkizýdi qamtamasyz etsin;

2) memlekettik qyzmettiń jaı-kúıin monıtorıngteý jáne memlekettik qyzmetterdi kórsetý sapasyn qoǵamdyq monıtorıngteý rásimderi sheńberinde jyl saıyn bıýrokratııadan aryltý jónindegi suraý salý júrgizýdi qamtamasyz etsin.

12. Qazaqstan Respýblıkasynyń Úkimeti memlekettik organdardy bıýrokratııadan aryltý jáne olardyń tıimdiligin arttyrý boıynsha usynystardy jınaý úshin turaqty jumys isteıtin onlaın-resýrsty iske qosýdy qamtamasyz etsin. Qazaqstan Respýblıkasynyń Strategııalyq josparlaý jáne reformalar jáne Memlekettik qyzmet isteri agenttikteri Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligimen birlesip, onlaın-resýrsqa túsetin usynystarǵa turaqty negizde taldaý júrgizsin.

13. Qazaqstan Respýblıkasynyń Úkimeti zańnamalyq aktilerge normalardyń zańnamalyq jaǵynan artyq (shamadan tys) reglamenttelýi turǵysynan revızııa júrgizsin, olardy Úkimet nemese memlekettik organdar jedeldilik maqsatynda zańǵa táýeldi normatıvtik quqyqtyq aktilerde aıqyndaýǵa tıis.

14. Qazaqstan Respýblıkasynyń Memlekettik qyzmet isteri agenttigi memlekettik apparatty bıýrokratııadan aryltý máseleleri boıynsha monıtorıng pen taldaýdy, onyń ishinde memlekettik organdardyń ishki ákimshilik rásimderin zerdelep, sondaı-aq olardyń nátıjelerin jartyjyldyq negizde Qazaqstan Respýblıkasy Prezıdentiniń Ákimshiligine engize otyryp, qamtamasyz etsin.

15. Qazaqstan Respýblıkasynyń Úkimeti on jumys kúni ishinde osy Jarlyqty iske asyrý jónindegi is-qımyl josparyn bekitýdi qamtamasyz etsin.

16. Qazaqstan Respýblıkasynyń Úkimeti osy Jarlyqtan týyndaıtyn ózge de sharalardy qabyldasyn.

17. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

18. Osy Jarlyq qol qoıylǵan kúninen bastap qoldanysqa engiziledi.

 

Qazaqstan Respýblıkasynyń Prezıdenti Q. Toqaev

Nur-Sultan, Aqorda, 2022 jylǵy 13 sáýir

№ 872