Qytaıdyń Shanhaı qalasynda koronavırýstyń omıkron shtamyn juqtyrǵan 25 mln-ǵa jýyq adam oqshaýlandy.
Indettiń qarqyn alýy Qytaı megapolısiniń osy ýaqytqa deıingi álemdik dertke qarsy qatań sharalardy ustanbaýynan bolyp otyr. Aýrýǵa shaldyqqandardyń sany artqan kezde ǵana 3 sáýir kúni barlyq qala boıynsha karantın jarııalandy. Turǵyndar úı qamaqta otyryp, as-sýlaryn tapsyryspen aldyrýǵa májbúr. Jergilikti bılik qala turǵyndaryn et, jumyrtqa, kókónispen qamtamasyz etip jatqanyn habarlady. Alaıda halyq dári-dármektiń tapshylyǵyn aıtyp, narazylyq bildirýde.
Bul – Shanhaıdaǵy alǵashqy jalpyqalalyq karantın. О́tken aıǵa deıin jergilikti bılik shaǵyn ǵana shekteýler engizip keldi. Tipti 2021 jyldyń naýryz aıynda indet juqtyrǵandardyń sany 1 800-ge deıin artqan kezde de Shanhaı qalasy tolyqtaı oqshaýlanýdan bas tartqan edi. Shanhaı Qytaıdyń ózge qalalarynan nege ózgeshelendi? Onyń basty sebebi – Qytaı ekonomıkasy úshin mańyzynda. Shanhaı osy ýaqytqa deıin Qytaıdy álemmen jalǵap turǵan kópir boldy, qazir de solaı. Ol 2018 jyldan beri eldiń jalpy saýdasynyń 10 paıyzdan astamyn qurap otyr. Jergilikti Caixin aqparat agenttiginiń habarlaýynsha, Shanhaı áýejaılary eldegi pandemııanyń alǵashqy kúnderinde qajet bolǵan qorǵanys quraldary men dári-dármektiń jartysyna jýyǵyn der kezinde jetkizip otyrǵan. Máselen, 2020 jyly Pýdýn halyqaralyq áýejaıynyń júk tasymaly 3,4 mln tonnaǵa jetken. Bul kórsetkish iri kólemde júk tasymaldanatyn Beıjiń, Gýanchjoý jáne Shenchjen áýejaılaryn biriktirip sanaǵanda birneshe esege artyq.
Gonkongtaǵy Qytaı ýnıversıtetiniń zertteýlerine qarasaq, Shanhaı sekildi megapolısterdiń jabylýy Qytaı ekonomıkasyna edáýir nuqsan keltiretini aıtylǵan. Sol sebepti Qytaı bıligi qalanyń elge ákeler paıdasyn turǵyndardan joǵary qoıyp otyrǵan jaıy bar.
Al álem elderi úshin bul qaýipti. COVID-19-dyń oshaǵy bolǵan Qytaı karantın sharalaryn qatańdatyp, shekarasyn bekem ustaý qajet dep otyr sarapshylar. Qytaı bıliginiń bul áreketine álem ǵalymdary pikir bildirip, burys sheshim bolǵanyn aıtýda. London gıgıena jáne tropıkalyq medısına mektebiniń professory Martın Gıbberd Shanhaıdyń bul sheshimi vırýstyń áldeqaıda juqpaly bolyp tabylatyn Omicron shtamyna sáıkes kelmedi dep sanaıdy.
О́zge elderdegi jaǵdaı qandaı? Djons Hopkıns ýnıversıtetiniń málimetinshe, álemde COVID-19 ınfeksııasyn 500 907 811 adam juqtyryp, 6 185 177 adam qaıtys bolǵan. Qazir AQSh-ta – 1 105 217, Úndistanda – 10 860, Germanııada – 3 624 615, Ulybrıtanııada – 1 617 068, Túrkııada – 200 060, Ýkraınada – 821 098, Reseıde 375 452 adam dertke shaldyqqan. Dúnıejúzilik densaýlyq saqtaý uıymynyń málimdemesi boıynsha bir apta ishinde KVI juqtyrǵandar sany tómendegen.
Infeksııa juqtyrǵan 80 mln-nan astam adam kórsetkishimen AQSh alǵashqy orynda tur. Odan keıin Úndistan – 45 mln adam. 30 mln turǵyny dertke shaldyqqan Brazılııa úshinshi orynǵa jaıǵasty. Al Ońtústik Koreıada koronavırýstyń omıkron XE shtamy alǵash ret tirkeldi. Bul derekti atalǵan eldiń juqpaly aýrýlarmen kúres jónindegi shtaby málimdedi. Indettiń jańa túrin juqtyrǵan naýqas naýryz aıynda qaıta vaksına alǵan.
Esterińizge sala keteıik, alǵash ret Ulybrıtanııada tirkelgen omıkron XE koronavırýsy Úndistanǵa da kelip jetkeni budan buryn habarlanǵan bolatyn. Alǵashqy naýqas 7 sáýirde anyqtaldy.
Sondaı-aq Germanııa bıligi dertke qarsy kúresti qatań qolǵa aldy. Búginde bul elde indetten qaıtys bolǵandardyń sany 3 myńnan aspaıdy. Germanııada testileý kórsetkishiniń sany ósken. Osy oraıda, Ulybrıtanııa bıligi de sáýir aıynyń sońyna deıin kún saıyn 100 myń adamdy testileýden ótkizetinin habarlady.