Qazaq kınoónerinde buǵan deıin fantastıka janry bolǵan-bolmaǵanyn bile bermeımiz. Bolsa da neken-saıaq, joqqa tán. Osy olqylyqtyń ornyn toltyrý maqsatynda Almatydaǵy Tiger Films kınostýdııasy batyl qadamǵa barmaqshy. Atalǵan ujym fantastıka túsiretinin resmı túrde málimdedi.
«Moı paren – ınoplanetıanın» fantastıkalyq fılminiń túsirilimi aldaǵy aptada bastalady. Qııal-ǵajaıyp janryndaǵy týyndy jer betindegi jáne ózge ǵalamshar arasyndaǵy baılanys, qııal-ǵajaıyp, mahabbat pen shytyrman oqıǵaǵa toly órbimek. Túsirilim aldynda shyǵarmashylyq top dástúr boıynsha jańa jobaǵa sáttilik tilep, jolashar yrymyn jasady.
Túsirilimi endi bastalatyn fılmniń rejısseri Alen Nııazbekovtiń aıtýynsha, «fantastıka – qazaq kınosynda tolyq qalyptaspaǵan jańa janr. Biz komedııadan ári qaraı jańa janrǵa bet burdyq. Osylaısha, «Moı paren – ınoplanetıanın» fılmi jańashyldyqqa toly bolady dep oılaımyn. Fılmde eki ǵalamshardyń baılanysy kórsetilip, mahabbatpen ushtasady. Qııal-ǵajaıyp janryndaǵy fılmniń basty rólderin akter Baýyrjan Satov pen Juldyz О́mirǵalı somdaıdy. Jer shary men Tıgarden juldyzy arasyndaǵy baılanys qos keıipkerdiń mahabbatymen jalǵasady. Budan basqa da negizgi rólderde Dáýren Serǵazın, Jahan Otarǵalıev jáne Qaırat Ádilgereı oınaıdy.
Dáýren Serǵazın,
teatr jáne kıno akteri:
– Meniń keıipkerim – sol ba- lalyq shaǵyndaǵy arman-qııa- lynyń jetegindegi adam. О́ziniń armanyna ǵashyq, óziniń armanyna senetin adamnyń biri. О́zge ǵalamsharlyqtarǵa ımandaı senedi, qatty izdeıdi. Solarmen kúresip, solardy ańdyp, osyndaı izdeniste júrgen keıipker.
Rano Ýmarova,
fılm prodıýseri:
– Bul qazaqstandyqtardyń súıikti fılmderiniń biri bolady dep oılaımyn. О́ıtkeni mahabbat pen fantastıkany juptastyramyz. Akterler quramy sheber ári tanymal adamdardan quralǵan. Túsirilim Almaty qalasy men oblysynda bolady, negizinen sha- ǵyn qalalarda túsiremiz.
Tiger Films kınostýdııasy 2021 jyly qurylǵan. Búginge deıin kórermenge úsh komedııalyq fılmdi tartý etipti. Týyndylary elimizden ózge Qyrǵyzstan men Ázerbaıjanda kórsetilgen kórinedi.