Qazaqstan fýtbol federasııasynyń qabyrǵasynda elimizde fýtzaldy damytý boıynsha ótken jıynda Qazaqstanda kásipqoı fýtzal lıgasyn qurý týraly usynys biraýyzdan qabyldandy. Sheshimdi fýtzaldan OLIMPBET-Qazaqstan chempıonatynyń barlyq klýbtary qoldady.
Lıga prezıdenti laýazymyna Asqar Ábildaev saılandy. Ol buǵan deıin Qazaqstan fýtbol federasııasynyń fýtzal departamentin basqarǵan bolatyn. Uıymnyń negizgi qyzmeti – fýtzaldan ishki jarystardy uıymdastyrý. Atap aıtqanda, OLIMPBET-Qazaqstan chempıonaty, OLIMPBET-Qazaqstan kýbogy, OLIMPBET-Qazaqstan Sýperkýbogy jáne barlyq jas ereksheligi boıynsha el birinshilikterin (U-13, U-15, U-17) ótkizý.
Sondaı-aq kún tártibine fýtzaldan Qazaqstan Birinshi lıgasyn qurý jáne jańa maýsymnan bastap fýtzal komandalaryn sertıfıkasııadan ótkizý máseleleri qaraldy.