Bıyl naýryzda azyq-túlik taýarlary baǵasynyń ósýi jyldyq mánde 15,4% jedeldedi, dep habarlaıdy Egemen.kz Ulttyq banktiń baspasóz qyzmetine silteme jasap.
Naýryzda Qazaqstanda tutyný baǵasy 3,7%-ke ósip, 1996 jyldan bastap osy aı úshin eń joǵary mándi kórsetti, jyldyq mánde baǵa 12% ósti.
Bıyl aqpanda ınflıasııa 8,7% boldy. 2022 jylǵy naýryzda azyq-túlik taýarlary baǵasynyń ósýi jyldyq mánde 15,4% boldy, aqpandaǵy kórsetkish – 10%. 2021 jylǵy qarashada nantoqash ónimderi men jarmalar qymbattaı bastap, astyq daqyldarynyń tómen túsimdiligine jáne álemdik baǵanyń joǵary bolýyna baılanysty jalǵasty. Maılar men toń maılar, sút ónimderi men et baǵasynyń ósýi jedeldedi. Dúrlikpe suranys qant baǵasynyń ósýin jedeldetýge yqpal etti. Baǵanyń ósýin jedeldetýge jemister men kókónisterdiń qymbattaýy eleýli úles qosty, al kókónister arasynda qyryqqabat, pııaz, sábiz, qyzanaq jáne kartop baǵasy aıtarlyqtaı ósti. 2022 jylǵy naýryzda jyldyq azyq-túlik emes taýarlardyń ınflıasııasy – 10,9%, aqpandaǵy kórsetkish – 8,6%.
Teńge baǵamynyń álsireýi taýarlardyń barlyq toby boıynsha baǵanyń ósýine áser etti. Kólikter mıkrochıpterdiń jetispeýshiligine baılanysty qymbattady. Import baǵasynyń ósýine baılanysty kıim men aıaq kıim, dári-dármek baǵasynyń ósýi jedeldedi. Aqyly qyzmetter baǵasynyń jyldyq ósý qarqyny 2022 jylǵy naýryzda 8,3% boldy, aqpandaǵy kórsetkish – 7,1%. Turmysqa jaıly turǵyn úıdi jalǵa alý baǵasy suranystyń artýy jáne turǵyn úı satyp alý qunynyń ósýine baılansty artty. Sondaı-aq ambýlatorııalyq qyzmetterdiń baǵasyda ósti.
Karantın shekteýleriniń joıylýy suranystyń ósýine jáne shashtarazdar, mádenıet jáne demalys qyzmetteri, meıramhanalar men qonaq úıler baǵasynyń ósýine ákeldi. 2022 jylǵy naýryzda óńdeý ónerkásibindegi óndirýshiler baǵasynyń ósýi – 23,3%, aqpandaǵy kórsetkish – 21%. Jyldyq mánde baǵanyń ósýi 16,5% quraǵan tamaq ónimderiniń qurylymynda janar-jaǵarmaı baǵasy, elektr energııasy jáne jemshóp daqyldarynyń qymbattaýy aıasynda et jáne sút ónimderin óndirýshiler baǵasynyń ósýi jedeldedi.