Qarjylyq pıramıda quryp, alaıaqtyqpen aqsha tabýdyń túrli tásilderin meńgergender bótenniń múlkin zańsyz ıemdenip, ózine sengenderdi san soqtyryp ketip jatady. Kún saıyn qatary artyp kele jatqan osyndaı alaıaqtar úshin áleýmettik jeli ózderiniń jymysqy áreketterin júzege asyrýǵa qolaıly bolyp tur.
Al alaıaqqa aldanǵandardyń aryzyn tyńdap, qylmystyń aldyn alý árıne, quqyq qorǵaýshylardyń mindeti. Jurttyń jıǵan-tergenin jasyryn otyryp sypyryp alyp, saıda sany, qumda izin qaldyrmaıtyn mundaılardy anyqtap, jaýapqa tartýda tergeý oryndarynyń orny erekshe.
Qyzylorda qalalyq polısııa basqarmasynda 2018 jyldan beri jumys isteıtin tergeýshi, aǵa leıtenant Nurbol Nurmaǵanbet alaıaqtardyń aldyn kesip, kúrmeýi qıyn qylmystyq isterdi tergeýmen aınalysady.
Onyń aıtýynsha sońǵy kezderi alaıaqtyq áreketke baratyndar kúrt kóbeıgen. О́zgeniń múlkin zańsyz ıemdenetinderge jaza qatańdaǵanymen ózine sengenderge ýádeni úıip-tógip, aqshasyn alyp, boı tasalaıtyndar qatary azaımaı tur.
Tergeýshi osyǵan deıin «Aılýna Gold», «Aı-Shýaq» atty qarjy pıramıdalaryn anyqtap, qylmystyq quqyq buzýshylyqtyń jolyn kesipti. Biliktiligi arqasynda kúdiktiniń kinásin dáleldep, isti sotqa joldady. 2021 jyly WhatsApp áleýmettik messendjerinde BEFREE atymen belgili bolǵan qarjy uıymyn ashqan toptyń qylmysyn áshkereledi. Tergep-tekserý jumystaryn júrgizý nátıjesinde «Vklad chat Erǵazy», Wall street sekildi topty uıymdastyrǵan kúdiktilerdiń qylmystyq is-áreketterin ashty.
«Bizdiń basty mindetimiz – qylmystyq isterdi tergeı otyryp, jábirlenýshiniń muń-muqtajyna kóńil bólý, qoǵamda quqyq buzýshylyqty boldyrmaý. Osy oraıda biz azamattardan túsken aryz-shaǵymdar boıynsha qolǵa alynǵan qylmystardy ashyp, anyqtap, olardy sotqa jiberemiz. Sot qylmyskerge ádil sheshim shyǵaryp, jábirlenýshilerdiń quqyǵyn qorǵaıdy», deıdi tergeýshi.
Qyzylorda