Qostanaı oblystyq sanıtarlyq-epıdemıologııalyq baqylaý departamenti kene shaǵyp alǵan 6 adamnyń dáriger kómegine júgingenin málimdedi. Olardyń ishinde 10 jastaǵy bala bar. Mamandar keneniń jyldaǵy merzimnen erte kóbeıip ketýiniń sebebi aýa raıynyń kúrt ysyp ketýimen baılanysty dep otyr.
Qansorǵysh jándikter ensefalıt, borrelıoz tárizdi juqpaly aýrýlar taratady. Ázirge kene shaǵyp emdeý mekemelerine júgingenderden ondaı qaýipti dert anyqtalǵan joq.
– Kene shaqqan alty adamnyń bári dárigerlerdiń baqylaýyna alyndy. Olardyń densaýlyǵy úsh apta boıy jiti qadaǵalanady. Sondaı-aq qazir ashyq dalada, egin alqaptarynda, mal sharýashylyǵynda eńbek etip júrgen adamdarǵa ekpe jasalady. Biz turǵyndardy asa saq bolýǵa shaqyramyz. Kene shaqqan adam dereý dárigerge qaralmasa, asqynǵan aýrý daýasyz dertke ulasýy múmkin, – dedi sanıtarlyq-epıdemıologııalyq baqylaý departamentiniń bólim basshysy Lıýdmıla Nalobına.
Qaýiptiń aldyn alý maqsatynda oblystyq SEB departamenti men Ulttyq saraptama ortalyǵy fılıalynyń mamandary Qostanaı jáne Altynsarın aýdandaryndaǵy eldi mekenderdiń mańaıynan kene jınap, jándikterdiń qandaı derttiń qozdyrǵyshtaryn taratýy múmkin ekenin anyqtamaq.
Qostanaı oblysy