О́tken demalys kúnderi elimizdiń alty qalasynda fýtboldan Qazaqstan chempıonatynyń altynshy týr oıyndary ótti.
Týrdyń ortalyq oıynynda keıingi eki jyldaǵy el chempıondary – «Tobyl» men «Qaırat» klýbtary kezdesip, asa tartysty ótken básekede komandalar teń tústi – 2:2. Ekinshi taımda «Tobyl» 2:1 esebimen alǵa shyqqanymen, match sońyna deıin jeńisti ýysynda ustap tura almady. Kezdesýdiń 99-mınýtynda almatylyqtar tarazy basyn teńestirip ketti. Eki kóshbasshy komanda upaı bóliskenin tıimdi paıdalanǵan «Kaspıı» óz alańynda «Atyraýdy» jeńip, týrnır kestesinde 13 upaımen jeke-dara kósh bastady.
Sonymen qatar bul týrda bıylǵy chempıonattyń debıýtanttary –«Maqtaaral» men «Aqsý» klýbtary Túrkistanda jolyǵyp, alǵashqysy chempıonattaǵy tuńǵysh jeńisine qol jetkizdi – 2:1. Al elordanyń «Astanasy» syrt alańda «Aqjaıyqtan» jeńilip, týrdyń sensasııasyn tirkedi – 1:0. Qalǵan oıyndardyń nátıjesi: «Taraz» – «Shahter» – 2:1, «Turan» – «Ordabasy» – 0:0, «Qyzyljar» – «Aqtóbe» – 1:1.
Erteń bastalatyn VII týrda «Astana» – «Kaspıı», «Atyraý» – «Tobyl», «Ordabasy» – «Qyzyljar», «Qaırat» – «Turan», «Shahter» – «Aqjaıyq», «Aqtóbe» – «Maqtaaral» jáne «Aqsý» – «Taraz» klýbtary kezdesedi.