Bul týraly Bilim jáne ǵylym mınıstri Ashat Aımaǵambetov Úkimet otyrysynda aıtty, dep habarlaıdy Egemen.kz.
«Jalpy elimizdiń kadr daıyndaıtyn oqý oryndarynda qazir 1,1 mln astam stýdent bilim alýda, ortasha eseppen jyl saıyn olardyń 300 myńy jumys naryǵyna shyǵady. Sapaly kadr daıyndaý úshin jumys eń basty 6 baǵyt boıynsha júrgizilýde. Sonyń ishinde bilimge qoljetimdilikti keńeıtý, akademııalyq erkindikti keńeıtip, menedjmentti jetildirý, bilim berý baǵdarlamalaryn jańartyp, jańa baǵdarlamalar ashý, jumys berýshilerdi kadrlardy daıarlaýǵa tartý jáne sapany qamtamasyz etý júıesi boıynsha jumys júrip jatyr», dedi A. Aımaǵambetov.
Joǵary bilimge qoljetimdilik boıynsha sońǵy birneshe jylda grant sany eki ese asty. Bıyl eń kóp 73 myń grant qarastyrylyp otyr. Stýdentterdiń stıpendııasy da eki ese artty.
«Biz UBT-ny sıfrlyq formatqa kóshirdik jáne jylyna 4 ret tapsyrý múmkindigin engizdik. Bul bizdiń talapkerler úshin óte qolaıly júıe. Oǵan qosa 11-synyp bitirýshileri shildede emes, qańtar aıynan bastap, oqýǵa shartty túse alady. Bul da ózge memleketke ketpeý úshin óte qolaıly sheshimderdiń biri dep aıtýǵa bolady. Biraq talaptar da kúsheıtilip otyr, pedagogıka boıynsha shekti ball 50-den 75-ke deıin kóterildi. Medısınalyq baǵyt boıynsha – 70 jáne zań baǵyttary boıynsha – 75-ke deıin kóterildi», dedi mınıstr.
Prezıdent tapsyrmasymen tehnıkalyq mamandyqtarǵa grant úlesi 40 paıyzdan 60 paıyzǵa deıin kóbeıtildi.
«Kolledjderde de oqý granttary sany jyl saıyn ulǵaıdy. Bıyl olardyń sany 31 myńǵa ósip otyr. Onyń 70 paıyzy tehnıkalyq mamandyqtarǵa beriledi. Kolledjderde oqýǵa qoljetimdilikti keńeıtý úshin emtıhandardy alyp tastadyq, áleýmettik jaǵdaıy tómen otbasylarǵa arnaıy kvota beriledi. Al granttar baıaǵydaı ár kolledjge bólinbeıdi. Endi naqty talapker stýdent tıisti grantty jeńip alady, sodan keıin ǵana kolledj tańdalady. Sáıkesinshe bul shara olardyń básekelestigin arttyrady», dedi ol.