Áleýmettik jobanyń maqsaty – ınklıýzıvti qoǵamdy damytý, múmkindigi shekteýli jandarǵa tolerantty qarym-qatynasty qalyptastyrý, qoǵamda álsiz toptardaǵy azamattardy kemsitý deńgeıin tómendetý, múgedektigi bar qazaqstandyqtardyń teńdigi, múmkindikteri boıynsha dıalogty uıymdastyrý, dep habarlaıdy Azamattyq bastamalardy qoldaý ortalyǵynyń baspasóz qyzmeti.
Jobany uıymdastyrýshylardyń aıtýynsha, múmkindigi shekteýli azamattar aıaýshylyq, dushpandyq nemese agressııa sııaqty teris reaksııalarmen jıi soqtyǵysady.
«Qazirdiń ózinde biz múgedektigi bar eresek adamdardyń bala kezinde kemsitýshilik faktilerin bastan keshirgenin jıi baıqaımyz. Olar qoǵamnan oqshaýlanady, olardyń áleýmettik baılanystary buzylady. Áleýmettik oqshaýlaý prosesi júredi. Iá, olar memleketten járdemaqy alǵanymen, úıde otyrady, qarym-qatynas ornatqan ortasy tar», dedi «Qorǵan-M» qoǵamdyq birlestiginiń tóraıymy Dıana Qyrǵyzbaeva jobany tanystyrý barysynda.
Spıkerdiń aıtýynsha, bıyl olar ınklıýzıvti qoǵam qurý máseleleri boıynsha jumys isteıtin mamandarǵa arnaıy semınar-trenıngter ótkizedi. Sondaı-aq emosıonaldy qıyndyqtardy jeńýde múmkindigi shekteýli adamdarǵa kásibı qoldaý kórsetetin psıhologter bilim alady.
Qoǵam belsendileriniń pikirine súıensek, eger ata-analar balalaryna janashyrlyq tanytýdy úıretse, múgedektigi bar adamdarǵa qatysty kemsitý oqıǵalarynyń oryn alýyn toqtatýǵa bolady.
«Barlyǵy otbasynan bastalady. Sondyqtan ınklıýzıvtik tárbıege erte jastan erekshe nazar aýdarý kerek. Atap aıtqanda, bizdiń uıymnyń qyzmetkerleri balabaqshalar men jalpy bilim beretin mektepterdiń tómengi synyp oqýshylary úshin ınklıýzıvti bilim berýmen aınalysady. Mundaı balalar ósken kezde múgedek adamdarǵa qatysty kemsitýshilik áreketterge jol bermeıtinine senimdimin», dedi Dıana Qyrǵyzbaeva.
Uıymdastyrýshylar ózekti máselelerdi talqylaý maqsatynda dıalog alańyn ótkizýdi josparlap otyr. Sonymen qatar joba aıasynda jas qazaqstandyqtar úshin semınarlar ótkizilip, onda «teń-teńimen» qaǵıdaty boıynsha ınklıýzıvti qoǵam qurý týraly aıtylady. Grant jobasy Aqparat jáne qoǵamdyq damý mınıstrliginiń tapsyrysy boıynsha júzege asyrylady.