«Pavlodar qalasy sýsyz qalady» degendi estigen jergilikti turǵyndar abdyrap qalǵany ras. Shalǵaıdaǵy eldi mekenderdiń ózi sapaly aýyz sýdyń qyzyǵyna kenelip jatqanynan habardar shaharlyqtar túsiniksiz oıdyń jeteginde júrgeni jasyryn emes. Máseleniń mánisine úńilip kórelik.
Jaǵymsyz aqparatty Pavlodar qalasyn taza aýyz sýmen jáne tehnıkalyq sýmen qamtamasyz etip otyrǵan monopolıst uıym – «Pavlodar-Vodokanal» JShS basshylyǵy jarııalap, qara bultty tóndirdi. Tipti jergilikti bılik qysym jasap, «reıderlik jolmen bıznesimizdi tartyp alǵaly jatyr» dep jar saldy.
Áńgimeni áriden bastaıyq. 2018 jyly «Pavlodar-Vodokanal» kásipornynyń quryltaıshysy Ertis ózeniniń saǵasynda jınalǵan qum turǵyndar tutynatyn sýǵa túspes úshin qumnan kirpish jasaý boıynsha ınvestısııalyq jobany qolǵa alǵan bolatyn. Joba memlekettiń ındýstrııalyq-ınnovasııalyq damý baǵdarlamasyna endi. Osylaısha, shıkizatty ońtústik bóliktegi sý jınaý aýmaǵynan alý jóninde kelisimshart jasaldy. Pavlodar qalasy ákimdiginiń qaýlysymen sharýashylyqqa qajetti jer telimi de bólingen.
Pavlodarlyqtarǵa kásipker Georgıı Shpeızerdiń esimi jaqsy tanys. Qurylys materıaldaryn óndirip qana qoımaı, oblys ortalyǵyndaǵy kópqabatty turǵyn úılerdi turǵyzýmen aty máshhúr. Ony tilge tıek etip otyrǵanymyz beker emes. Georgıı jáne onyń jubaıy Irenaǵa «Pavlodar-Vodokanal» JShS, Kaz Ziegel, «WEST-Kvazar» sııaqty iri kompanııalar tıesili. Kirpish, beton ónimderin shyǵaratyn «WEST-Kvazar» seriktestigi qumdy qaıdan alatynyn joǵaryda jazdyq. Kásipkerdiń aıtýynsha, 2018-2020 jyldar aralyǵynda Ertis saǵasy qumnan júıeli tazalanyp kelgen. Sýdy qumnan tazartatyn gıdrotehnıkalyq nysandardy salý úshin 542 mln teńgeden astam qarajat jumsalǵan.
Dese de, 2020 jyly oblystyq tabıǵatty qorǵaý prokýratýrasy jer telimi zańsyz berilgenin anyqtap, kelesi jyly mamandandyrylǵan aýdanaralyq sot jer telimin jalǵa berý týraly kelisimshartty zańsyz dep tanydy. Kásipkerdiń bezektep otyrǵany sodan. Ol byltyr ózen saǵasy qumnan tazalanbaǵandyqtan sý berý júıesi daǵdarysqa ushyraıtynyn alǵa tartýda. Qumdy tazartý jumys- taryna shekteý qoıylsa, pavlodarlyqtar aýyz sýdan qaǵylady dep baıbalam salýda. «Munyń barlyǵy syltaý sııaqty. Bul – bizdiń bıznesimizdi reıderlik jolmen basyp alýdyń amaly», deıdi kásiporyn basshylyǵy.
Jergilikti bıliktiń óz ýáji bar. Olar sottyń sheshimine qarsy kele almaıtynyn aıtady. Zań bárine ortaq. Al pavlodarlyqtardy sýmen qamtýǵa alańdaýǵa negiz joq, dep sendirdi Pavlodar qalasy ákimdigi.
PAVLODAR