Keshe keshikisin, 8 sáýirde jergilikti ýaqytpen 18 saǵat 51 mınótte polısııanyń kezekshi bólimine Atyraýdaǵy temir jol vokzalyna jarylǵysh zat qoıyldy dep shalynǵan telefon qońyraýy jalǵan bolyp shyqty. Bul týraly Atyraý oblystyq ishki ister departamenti baspasóz qyzmetiniń jetekshisi Gúlnázıra Muhtarova habarlady.
Sýyt habar túsisimen jedel qyzmet ókilderi aıaǵynan tik turdy. Temir jol vokzalynyń ǵımaraty qorshaýǵa alynyp, odan 250 adam qaýipsiz jerge shyǵaryldy. Arnaıy mamandar vokzal ǵımaraty men oǵan taıaý ornalasqan ózge de ǵımarattardy jiti tekserip, qoldan jasalǵan jarylǵysh zattyń joq ekendigine kóz jetkizdi. Al polısııa qyzmetkerleri jalǵan aqparat berip, qońyraý shalǵan áıel adamdy anyqtady. Telefon qońyraýy Atyraý qalasyndaǵy 157/11 jalpy rejımdegi túzetý mekemesindegi taksofonnan shalynǵan. Jalǵan aqparat berýshi osy kolonııada jazasynyn óteýshi bolyp shyqty. Ol 1994 jyly Aqtóbe oblysynda dúnıege kelgen. Buǵan deıin Qylmystyq Kodekstiń 242-babymen (Terrorızm aktisi týraly kórineý jalǵan habarlaý) 3 jylǵa bas bostandyǵynan aırylǵan.
Qazir jalǵan aqparat taratýshy óziniń aıybyn moıyndap otyr. Endi oǵan qatysty atalǵan bap boıynsha qylmystyq is qozǵaý máselesi sheshilý ústinde.
Joldasbek Shópeǵul.
Atyraý oblysy.
Derekkóz: G. Muhtarova.
Foto: R. Qoılybaev.