Búgin, 9 sáýir kúni fýtboldan Qazaqstan premer-lıgasy 5-týrynyń oıyndary oınaldy. Bul týraly egemen.kz tilshisi habarlady.
Tarazda jergilikti komanda buǵan deıingi sátsiz oıyndarynyń qarymyn qaıtaryp, Semeıdiń «Spartagyn» 2:0 etip súrindirdi. Goldardy alań ıeleri sapynan Sergeı Skoryh (60) pen Alekseı Shıotkın (71) soqty. Dál osyndaı esep Qaraǵandyda da tirkeldi. Kenshiler qalasynyń komandasy «Atyraýdy» utty. Al goldardy Ulan Qonysbaev (56) pen Andreı Poryvaev (89) óz esepterine jazdy. Mundaı esep Pavlodarda «Ertis» pen «Ordabasy» (Shymkent) arasyndaǵy kezdesý sońynda da tabloda janyp turdy. Onda da alań ıeleriniń desi basym boldy. Bul olardyń sapyndaǵy Igor Býrzanovıchtiń 13 jáne 16-mınýttar qarsylastar qaqpasyna eki gol soǵýy arqyly oryndaldy.
Qostanaıda «Tobyl» men Qyzylordanyń «Qaısary» arasyndaǵy match kúshtini anyqtaı almady. Munda qonaqtar birinshi bolyp esep ashty. Ony 28 mınýtta Sergeı Strýkov jasady. Tobyldyqtar onyń esesin 50-mınýtta ǵana qaıtardy (Tomas Shımkovıch). Taǵy bir teń oıyn Almatyda «Qaırat» pen «Astana» arasyndaǵy oıynda tirkeldi. Onda qarsylastar bir-birleriniń qaqpalary qulpyn asha almady. Munyń esesine, «Aqtóbe» óz alańynda Taldyqorǵannyń «Jetisýyn» tize búktirdi. Goldy 74-mınýtta Markos Pızellı túsirdi.
Damır Qojamqul.
Derekkóz: egemen.kz.
Foto: spotrs.kz..