Halyqaralyq mektep oqýshylarynyń gımnazıadasy – 16-18 jas aralyǵyndaǵy oqýshylarǵa arnalǵan iri halyqaralyq mýltısporttyq is-shara. Bul iri halyqaralyq sporttyq joba alǵash ret 1974 jyly uıymdastyrylǵan. Buǵan deıin Fransııada tórt halyqaralyq gımnazıada (Orlean, 1976, Lıll, 1982, Nıssa, 1986 jáne Kan, 2002) ótkizilgen. 2024 jyly Parıjde Olımpııa oıyndary ótetinin eskersek, oqýshylar arasyndaǵy biregeı halyqaralyq sporttyq is-sharanyń mańyzdylyǵy zor.
19-shy jazǵy Gımnazıada Fransııada (Normandııa) bıyl 14-22 mamyr aralyǵynda ótedi. 20 sport túrinen saıystar 9 qalada ótkiziledi: Kan, Dovıl, Ekýv, Granvıl, Gavr, Montıvıle, Pon-Odemer, Rýan, Val-de-Reı. 70 elden 3 500 oqýshy baq synaıdy. Aıta keteıik, Qazaqstan bul baıqaýǵa alǵash ret qatysady.
Qazaqstan paralımpıadalyq sport túrleri men breık-dans / bı sportynan basqa sport túrlerine qatysady. Qazaqstandyq delegasııany Bilim jáne ǵylym mınıstrliginiń Ulttyq ǵylymı-praktıkalyq dene tárbıesi ortalyǵy bastap barady. Delegasııanyń quramynda 294 adam bar, qatysýshylar sany boıynsha el quramasy Fransııa men Brazılııadan keıingi 3-orynda. Gımnazıada baǵdarlamasy sadaq atý, kórkem gımnastıka, jeńil atletıka, badmınton, 3h3 basketbol, jaǵajaı voleıboly, boks, bı sporty / breık-dans, semserlesý, dzıýdo, sporttyq baǵdarlaý, yrǵaqty gımnastıka, regbı-7, júzý, ústel tennısi, thekvondo, kúres, paralımpıadalyq: jeńil atletıka, dzıýdo, júzý sportynan turady. Halyqaralyq joba dúnıejúzilik onlaın-platformalarda kórsetiledi.
Gımnazıada ótetin Normandııa – Fransııadaǵy eń tanymal aýmaqtardyń biri. Bul aımaq óziniń tarıhymen, ártúrli qalalardaǵy mádenı eskertkishterimen, sonymen qatar sportqa degen aıryqsha kózqarasymen áıgili. Halqynyń tórtten bir bóligi 20 jasqa tolmaǵan jasóspirimder, ıaǵnı bul óńir jastarǵa baǵyttalǵan. Ártúrli sport túri boıynsha 7 880 sport klýbynda 730 myńnan astam sportshysy bar Normandııa – ulttyq jáne halyqaralyq sporttyq is-sharalar jıi ótkiziletin óte belsendi sporttyq aımaq. Normandııanyń aýyldyq jerleri teńiz jaǵalaýynda ornalasqan.
Búkil álemniń jas sportshylarynyń qatysýymen ótetin eń bedeldi halyqaralyq mýltısporttyq is-sharada qazaqstandyq oqýshylar elimizdiń namysyn qorǵap, álemniń túkpir-túkpirinen kelgen oqýshylar arasynan dostar tabýǵa, álemdi saıahattaýǵa múmkindik alady. El úmitin arqalaǵan jas sportshylarǵa sáttilik serik bolsyn.
13 mamyr kúni Halyqaralyq N.Nazarbaev áýejaıynda Bilim jáne ǵylym mınıstriniń qatysýymen sportshylardy shyǵaryp salý rásimi ótedi.