Qostanaı oblysy bıyl qazaq jýrnalıstıkasynyń atasy, aqyn, kósemsózshi Muhametjan Seralınniń 150 jyldyǵyn atap ótedi. Ataýly mereıtoıǵa daıyndyq sharalary barysynda byltyr Qarabalyq aýdanyna qarasty О́rnek aýylyndaǵy aqyn zıraty jańartylyp, aýdan ortalyǵyna eskertkish belgi ornatyldy. Sondaı-aq birtýar qaıratkerdiń týǵan aýyly О́rnekte abattandyrý jumystary júrgizilip, aýdan ortalyǵyndaǵy M.Seralın atyndaǵy kóshe jóndeýden ótti.
Qarabalyq aýdany ákiminiń orynbasary Ibragım Bekmuhamedovtiń aıtýynsha, ótken jyly bastaý alǵan ıgi sharalar bıyl da jalǵasyn tabatyn bolady.
– Aýdanda arnaıy jumys toby qurylyp, Muhamedjan atamyzdyń 150 jyldyǵyn atap ótý jospary túzilgen. Osy jospardyń negizinde jasalǵan baǵdarlamaǵa jıyrma shaqty is-shara engizildi. Onyń ishinde qaıratkerdiń ómiri men qyzmeti týraly derekter men tolyq murasyn jeke jınaq etip shyǵarý, «Gúlhashıma», «Topjarǵan» poemalaryn orys tiline aýdarý kózdelip otyr. Sondaı-aq ǵylymı-praktıkalyq konferensııa, mádenı jáne sporttyq is-sharalar uıymdastyrylyp, oblystyq «Qostanaı tańy» gazetinde M.Seralınge arnalǵan jazba aıtys ótetin bolady, – dedi I.Bekmuhamedov.
Irgedegi Troısk qalasynda qazaqtyń alǵashqy qoǵamdyq saıası jáne ádebı-mádenı jýrnaly «Aıqaptyń» redaktory bolǵan qalam qaıratkeriniń mereıtoıy kezinde ózi ashqan burynǵy «Aýyl», búgingi «Qostanaı tańy» gazetiniń 100 jyldyǵyna tuspa-tus kelip tur. Oblystyq gazettiń bas redaktory Januzaq Aıazbekovtiń aıtýynsha, kósemsózshi osy gazettiń alǵashqy nómirinen bastap, 1926 jylǵa deıin úzdiksiz shyǵýyna ter tókti. Redaktor bola júrip, gýbernııalyq atqarý komıtetiniń tóraǵasy qyzmetin de atqardy. Keńes ókimeti endi qurylǵan kezeńde tyǵyryqtan jol taýyp, redaksııa jumysyn uıymdastyryp, alǵa jyljyta bildi. M.Seralınniń qazaq rýhanııatynda alatyn orny erekshe deıtinimiz sondyqtan.
– Muhametjan Seralınniń sáýle túspegen, áli tolyq baǵasyn almaǵan eńbekteri bar. Aldaǵy ýaqytta sonyń bári saralanýǵa tıis. Meni alańdatyp otyrǵany, máselen, M.Seralın qazaq jýrnalıstıkasynyń atasy deımiz. Ol kisi shyǵarǵan «Aıqap» jýrnaly búkil qazaq dalasyna tarap turdy. Oǵan Alash arystary ún qatqan. Endeshe, biz bul mereıtoıdy respýblıkalyq deńgeıde nege atap ótpeımiz? Nege bul kisiniń mereıtoıyn atap ótý jóninde respýblıkalyq deńgeıde baǵdarlama kórinbeıdi? Osy jaǵyna mán berilmeı otyrǵan sekildi. Budan otyz-qyryq jyl buryn aldyńǵy býyn aǵa urpaq Muhamedjan Seralınniń ulttyq kásibı jýrnalıstıkanyń negizin qalaǵan eńbegin jan-jaqty taldap, saralap, zerttedi. Qazirgi býynda osy jaǵy kemshin túsip jatyr. Negizinde, M.Seralındi memleket qaıratkeri desek te qatelespeımiz. О́ıtkeni, Ahmet Baıtursynuly ekeýi Qazaqstan ólkelik komıssııasynyń múshesi retinde qazirgi Qostanaı oblysyn kórshiles Chelıabi gýbernııasynyń aýmaǵynan Qazaqstanǵa qaıtaryp alýǵa belsene kirisip, osy maqsatta tize qosyp, aıqasqan adamdar. Sonyń nátıjesinde Qostanaı oblysy qaıtadan ózimizge qosyldy. Bul týraly derek-dáıek jetkilikti, – dedi Januzaq Aıazbekov.