Ortalyq kommýnıkasııalar qyzmetinde «Samuryq-Energo» AQ basqarma tóraǵasy Almasadam Sátqalıev baspasóz máslıhatyn ótkizdi. Ol Memleket basshysy júktegen tapsyrmalardyń oryndalý barysy týraly áńgimeledi.
Salaǵa sheteldik ınvestorlar tartý jónindegi tapsyrmanyń oryndalýyn «Samuryq-Qazyna» qory baqylap otyrǵany málim. Bizdiń qoǵamnyń jumysy da qordyń jiti nazarynda. Búginde kompanııamyz halyqaralyq iri kompanııalardyń qatysýymen birqatar jobany júzege asyryp jatyr. Onyń eń mańyzdysy – Balqash JES qurylysy. Bul jobanyń qurylysy Samsung C&T jáne KEPCO koreı konsorsıýmymen birlesip júrgizilýde. Atap aıtarymyz, Balqash jylý-elektr stansasy qorshaǵan ortaǵa eshqandaı zııan keltirmeıtin bolady. Onda kómir jaǵýdyń eń ozyq tehnologııalary men jabdyqtary, sondaı-aq, ulttyq tabıǵatty qorǵaý normatıvteri men Eýroodaq standarttaryn saqtaýdy qamtamasyz etetin gaz tazalaý qondyrǵylary ornatylady, dedi basqarma tóraǵasy.
Aksıonerlik qoǵam jetekshileri Memleket basshysynyń óndiristik personaldyń jalaqysyn kóterý jónindegi tapsyrmasyn da oryndap jatyr eken. Sondaı-aq, múmkindigi shekteýli jandardy jumysqa ornalastyrý boıynsha da úlken jumystar júrgizilgen kórinedi. «Kompanııa óndiristik personaldyń jalaqysyn kóterý jónindegi tapsyrmany oryndady. Jalpy, jalaqynyń ortasha deńgeıi shamamen 135 myń teńgeni quraıdy. Biz ózimizdiń óndiristik, ınjenerlik-tehnıkalyq personaldarymyzdyń jalaqysyn osy deńgeıge jetkizdik, bul saladaǵy kadr turaqtylyǵyn qamtamasyz etip, kásipqoı kadrlardy kompanııanyń energetıkalyq nysandaryna bekitýge, ujym aldyndaǵy áleýmettik baǵdarlamany oryndaýǵa múmkindik berdi. О́stip, kadr turaqtylyǵyn basty nazarǵa aldyq», dedi A.Sátqalıev.
Kompanııada múmkindigi shekteýli jandardy jumysqa ornalastyrý boıynsha da úlken jumystar atqarylyp jatyr. Qazir kompanııada osyndaı 111 adam jumys isteıtin kórinedi. Al bıylǵy jyl sońyna deıin taǵy da múmkindigi shekteýli 70-shaqty adamdy jumysqa qabyldaýdy josparlap qoıypty.
Qaısar JÚSIP.