О́tken jyly týǵanyna seksen bes jyl tolǵan qazaq balalar ádebıetiniń kórnekti ókiliniń biri, birneshe kitaptyń (ishinde nemis, orys tilderinde shyqqan týyndylary men óziniń ertegileri de bar) avtory, Jambyldyń ádebı-memorıaldyq mýzeıin uzaq ýaqyt basqarǵan marqum Muhametjan Etekbaev elge belgili shyǵarmashylyǵymen qatar, naǵyz qonaqjaı adam edi.
Ol óziniń týǵan jeri – Jambyl aýdany Qaraqystaq aýylyndaǵy qarashańyraǵynda talaı qalamgerdi, óner adamdaryn syılap kútip, meımandostyq aq peıilin tanytqan jaıdary jan bolatyn.
Al endi Muhametjan aǵanyń jan jary, qazaqtyń ataqty, aıbyndy baıy Medeý Pusyrmanovtyń urpaǵy bolyp keletin qazir kózi tiri Hazıma Aıdarbekova ájemiz bergen myna sýrettiń jaı- jaǵdaıyna keleıik.
О́tken ǵasyrdaǵy 1970 jyldyń kókteminiń orta tusynda Muqań qazaqtyń eki qalamgeri – Qabdesh Jumadilov pen Sáýirbek Baqbergenovti qushaq jaıa qarsy alady.Aldymen árıne, ózi jetekshilik etetin Jambyl mýzeıine aparyp, asyqpaı ábden aralatady. Sonań soń úsheýi Qaraqystaq aýyly tusyndaǵy asqaq Alataý bókterine kóterilip, «kóńil qusyn kókke ushyrǵan» ǵoı.
Dál osy jerde qazaq ádebıetiniń bolashaq klassıgi Qabdesh Jumadilov pen oıly ocherkteri men talaı tamasha roman-povesterimen tanylǵan maıdanger qalamger Sáýirbek Baqbergenov úsheýi Alataý baýraıynda eskertkish úshin sýretke túsipti.
Sol jaqtan bastasaq, aldymen Muhametjan, odan keıin tartymdy týyndylarymen birge býryl shashymen, qoıý murtymen sáni kelisken Sáýirbek ata jáne qalamgerlik eren eńbegimen qazaq ulty úshin beli qaıysqan Qabdesh aǵa.
Berikbaı QADYQOV,
jýrnalıst
Almaty oblysy,
Qarasaı aýdany