Túrkistan oblysynyń Saıram, Sozaq aýdandarynyń turǵyndaryn tamasha ónerimen tánti etken Qurmanǵazy atyndaǵy Qazaq memlekettik akademııalyq halyq aspaptary orkestriniń «Turan dalasyna kúı shashý» atty gastroldik konserti oblys ortalyǵynda jalǵasyn tapty.
Kıeli Túrkistanǵa arnaıy kelgen tarıhı orkestr «Kongress holl» kópsalaly kesheninde qazaq halqynyń dáýlesker kúıshileriniń kúıleri men uly kompozıtorlarynyń ánderinen shashý shashty. Sonymen birge álem mýzykanttarynyń klassıkalyq týyndylaryn tartý etti.
Konsertte Qazaqstannyń eńbek sińirgen ártisi – Maıra Muhamedqyzy, Qazaqstannyń eńbek sińirgen qaıratkerleri – Jubanysh Jeksenuly, Jeńis Ysqaqova, Mádenıet salasynyń úzdigi Aınur Ábildaeva án shyrqap jurtshylyqtyń yqylasyna bólendi.
Orkestrdiń bas dırıjeri – «Daryn» jastar syılyǵynyń laýreaty Abylaı Tilepbergen men dırıjer, mádenıet qaıratkeri Jeksen Aısyn da orkestrdi shabyttandyryp, mýzyka álemine jeteleı bildi. Mazmundy da áserli kesh syılaǵan orkestr ujymyna túrkistandyqtar rızashylyqtaryn bildirip, qurmet kórsetti. Orkestrdiń oblystaǵy óner sapary Ordabasy aýdanynda túıindelmek.