Qazaqstan halqy Assambleıasynyń 18 sáýirde bolatyn kezekti sessııasynyń kúni jaqyndaǵan saıyn onyń «Strategııa – 2050: beıbitshilik, rýhanııat jáne kelisim mádenıeti» atty taqyrybyn talqylaǵan túrli sharalar da kóbeıýde. Sonyń biri keshe L.N.Gýmılev atyndaǵy Eýrazııa ulttyq ýnıversıtetiniń bas korpýsynda bolyp ótti.
Onda oqý ornynyń ustazdar men stýdentter qaýymynyń ókilderi ýnıversıtette Qazaqstan halqy Assambleıasynyń atyn alǵan kafedrada Májilis depýtaty, general-leıtenant, ǵalym Abaı Tasbolatovpen kezdesti. Kezdesýdi ýnıversıtet prorektory, belgili ǵalym Dıhan Qamzabekuly ashyp, júrgizip otyrdy. О́ziniń kirispe sózinde ǵalym Assambleıanyń kózdegen eń birinshi kezektegi maqsaty elimizdiń ishindegi tatýlyq pen birlikti uıystyrý ekenin atap ótti. Uıymnyń osy muratyn stýdent jastarǵa, qoǵam múshelerine belgili qoǵam qaıratkerleriniń kózimen, parasatymen bildirý, nasıhattaý bizdiń mindetimiz. Sondyqtan búgingi kezdesýge elimizge belgili azamat, áskerı qaıratker ári pedagog, tarıh ǵylymdarynyń doktory, Májilis depýtaty Abaı Bólekpaıulyn shaqyryp otyrmyz dep qonaqty jınalǵandarǵa keńinen tanystyryp ótti.
Odan arǵy sózinde Dıhan Qamzabekuly Assambleıa jumysyna tereń baǵa berip, onyń tarıhı orny osy kúni ábden anyqtalyp, beıbitshilik pen kelisimniń dúnıejúzine tanylǵan uıymyna aınalǵanyn aıtty. Álemniń basqa túkpirlerin aıtpaǵanda, keshegi keńestik keńistiktiń ózinde bolyp jatqan neshe túrli etnosaralyq keleńsiz oqıǵalardy kórip, bilip otyrmyz. Qazaqstanda sondaı oqıǵalardyń aldyn alýǵa, boldyrmaý turǵysynda Assambleıanyń atqaryp júrgen jumystary ulan-ǵaıyr, dedi ol. Sonymen birge, oqý ornynyń basshysy Qazaqstan halqy Assambleıasynyń 18 sáýirde bolatyn sessııasyna bir kún qalǵanda ýnıversıtette «Astana kóktemi» atty shara ótkiziletinin jetkizdi. Oǵan sessııaǵa qatysýǵa kelgen Assambleıa músheleriniń bári de qatysady dep kútilýde, degen Dıhan Qamzabekuly kelesi sózdi meımanǵa berdi. Abaı Bólekpaıuly óziniń áńgimesin Assambleıanyń mańyzyna toqtalýdan bastady. Búgingi kúni QHA eldegi tatýlyq pen tynyshtyqty saqtaýda aıryqsha ınstıtýt bolyp otyr. Mundaı belsendi qyzmet atqaryp otyrǵan uıym Qazaqstannan basqa elde joq. Bul Qazaqstan Prezıdenti Nursultan Nazarbaevtyń eldegi etnosaralyq tynyshtyq pen tatýlyqty saqtaýǵa, sonyń arqasynda memlekettegi ekonomıkalyq turaqtylyqty saqtaýdy kózdep, osy isterge yqpal etetin organ retinde arnaıy qurǵan uıymy. Onyń ómirsheńdigin, áleýmettik suranysqa ıe ekendigin ómirdiń ózi kórsetip otyr. Tipti, jyldan-jylǵa bul uıymnyń mańyzy da arta túsýde. Sondyqtan da Assambleıanyń jumys tájirıbesin alys-jaqyn shetelderden arnaıy adamdar, áleýmettik salanyń ǵalymdary kelip zertteýde. Assambleıa qatarynan 9 adam Parlament depýtaty bolyp saılanǵan. Sol áriptesterimiz túrli mádenı-etnostyq birlestikterdiń ókilderi bolyp tabylady. Olar bizdiń zań shyǵarý organymyzǵa etnostardyń túrli problemalary men usynystaryn jetkizedi jáne ortalyq atqarýshy bılik oryndaryna bıik minberden depýtattyq saýaldar jasap, etnostarǵa qatysty túrli máselelerdiń sheshilýine yqpal etedi, dedi ol. A.Tasbolatov odan ári depýtat retinde óziniń atqaryp júrgen keıbir qyzmetteri týraly áńgimeledi. Sonyń ishinde Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev ekeýiniń Aýǵanstanǵa parlamenttik delegasııa músheleri retinde barǵan resmı sapary týraly aıtty. Bul elde emin-erkin júrý múmkin emes, kúndiz-túni tynyshtyq joq. Bizdi de jan-jaǵymyzdan kúzet qyzmetkerleri qalyń top bolyp alyp júrdi. Talıbterdiń jankeshtileri sheteldik qonaqtardyń bárin de jaý kórip, qoldarynan kelse jaryp jiberýge ázir turady eken. Qonǵan qonaqúıimizde de biz attanǵannan keıin eki kún ótkende jarylys bolypty. Alaıda osyndaı memleketke de kómek qolyn sozyp jatyrmyz. Bizde tynyshtyq, basqalar ne bolsa, o bolsyn dep aıtýǵa bolmaıdy. О́ıtkeni, kórshidegi turaqsyzdyq kez kelgen elge qaýip. Prezıdent N.Nazarbaevtyń bastamasymen Qazaqstanda aýǵandyq jastardyń beıbit mamandyqtarǵa oqyp jatqanyn bilesizder. Bular elderine soǵysshyldyq emes, erteń beıbit maqsat aparary sózsiz. Sondyqtan da Qazaqstannyń bul bastamasyn Aýǵanstan basshylyǵy ǵana emes, barlyq progressıvti adamzat qoldap otyr. Aıta ketetin jaıt, ortalyqazııalyq kórshiler arasynan Aýǵanstanǵa bizdeı eshkim de kómektesip jatqan joq. Kerisinshe, bári de odan jamandyq kútip, esik-terezelerin bekitýde. Erteń alıans áskerıleri túgel shyqsa, aýǵandyqtar kórshilerine de zııanyn tıgizýi múmkin, deıdi olar. Zııanyn tıgizbeý úshin olarǵa paıdaly kómek jasaǵylary kele qoımaıdy, dedi depýtat. Sondaı-aq, ol Qazaqstannyń NATO-men yntymaqtastyǵy týraly da aıtty. Onyń Parlamenttik Assambleıasyna Ortalyq Azııa memleketteri arasynan qazaqstandyq delegasııa ǵana shaqyrylatynyn jetkizdi. Jastyq shaǵy, joǵary kásibı bilim alý jyldary týraly áńgimelegen kezde, general KSRO-daǵy ultaralyq qatynastar máselelerine de toqtalyp ótti. Onyń sol kezdiń nasıhat quraldary jarnamalaıtyndaı ádiletti ekenin is júzinde kórmeıtinbiz. Sonyń ishinde ana tilimizde sóıleýge qatty tyıym salatynyn bastan keshtik. Al bizdiń, Qazaqstannyń etnosaralyq saıasaty kerisinshe, barlyq etnostardyń ózderiniń ulttyq tilin saqtap, salt-dástúrlerin jańǵyrtýyna barlyq múmkinshilikterdi jasap otyr. Qazaqstan halqy Assambleıasy bul istiń uıytqysy jáne ol barlyq ult pen ulysty qazaq ultynyń tóńiregine toptasýǵa shaqyrady, dedi A.Tasbolatov. Kezdesý sońynda general jınalǵandardyń kóptegen suraqtaryna jaýap berdi. Oqý ornynyń basshylyǵy stýdentter atynan depýtatqa estelik syılyqtar tapsyrdy.
Jaqsybaı SAMRAT,
«Egemen Qazaqstan».
Sýretterdi túsirgen Erlan OMAROV, «Egemen Qazaqstan».