Prezıdent Ramazan aıynda arnaıy dastarqan jaıyp, aýyzashar berdi, dep habarlaıdy Egemen.kz Aqordanyń resmı saıtyna silteme jasap.
Qasym-Jomart Toqaev jınalǵan qaýym aldynda sóılegen sózinde bul ıgi dástúrdiń halyqty bereke-birlikke shaqyratynyn atap ótip, ádiletti qoǵam qurýdyń mańyzdylyǵyna toqtaldy.
«Jaqyn arada Konstıtýsııamyzdy ózgertetin boldyq. Biraq, eń aldymen, jurtymyzdyń sana-sezimi jańǵyrýy qajet. Bul – ońaı sharýa emes. Aldymyzda kóptegen túıtkilder bar, sondyqtan bárimiz jumyla eńbek etýimiz kerek. Eń bastysy, nıetimiz taza, peıilimiz túzý bolýǵa tıis. Bir-birimizge janashyrlyq tanytýymyz kerek. Qazir búkil adamzatqa dál osyndaı qasıetter jetispeı jatyr», dedi Prezıdent.
Qasym-Jomart Toqaev jastarǵa durys baǵyt-baǵdar berilýi kerek ekenin, bilimdi, kózi ashyq, kókiregi oıaý, otanshyl jastar ǵana keleshektiń ıesi bolatynyn erekshe atap ótti. Prezıdenttiń pikirinshe, jastarymyzdyń ulttyq qundylyqtardy boıyna sińirip, qazirgi zamannyń ǵylym-bilimin ıgerýi aıryqsha mańyzdy.
Memleket basshysy ıslam dininiń órkenıet qundylyqtaryn, beıbitshilik uǵymdaryn nasıhattaıtynyn atap ótti.
«Jurtymyz qashanda beıbit ómirdi baǵalaı bilgen. Biz osy ustanymnan aınymaımyz. Ol úshin elimizge bereke-birlik, ózara túsinistik qajet. Islam adamdardy bólinýge emes, birlikke shaqyrady. Imandylyq – eń asyl qasıet. Sondyqtan, dástúrli dinimiz urpaq tárbıesiniń ózegi bolýy kerek. Urpaqqa osyndaı ónegeli tárbıe berý – bárimizdiń ortaq mindetimiz», dedi Qasym-Jomart Toqaev.
Aýyzashar barysynda Memleket basshysy elimizge tatýlyq pen tynyshtyq tiledi.