Jaqynda elordada «Astana Tazartý» JShS-niń gazben jáne dızel otynymen júretin sońǵy úlgidegi quraldarymen jabdyqtalǵan jańa mamandandyrylǵan tehnıkalarynyń tusaýkeseri bolyp ótti.
Qalanyń ekologııalyq ahýalyn jaqsartý maqsatynda «Astana Tazartý» JShS-niń turmystyq qaldyqtar men kúl-qoqys shyǵaratyn 9 tehnıkasy atalmysh júıemen jabdyqtaldy. Jabdyq tolyqtaı synaqtan ótti. Mamandardyń aıtýynsha, gazdy otyn júıesin engizýdiń basty artyqshylyǵy – qorshaǵan ortaǵa jiberiletin ýly qaldyq zattardyń meılinshe tómendeýine yqpal etedi. Sonymen qatar, birtindep gazdy otynǵa aýysý janarmaı satyp alý shyǵynyn aıtarlyqtaı azaıtady.
«Eýropa – gaz ballony quralyn paıdalanýda birinshi orynda tur. О́kinishke qaraı, keńestik keńistik elderinde ekonomıkalyq tıimdilik basymdyqqa alynǵan. Árıne, ol da mańyzdy ekenin túsinemin. Bizdiń qural dızel qozǵaltqyshy shyǵyndylarynyń ekologııalyq áserin aıtarlyqtaı jaqsartady jáne adamnyń densaýlyǵyna zııan qaldyqtardy azaıtady», dedi tusaýkeserde sóılegen sózinde «Avtogaz Global» prezıdenti Mıhaıl Iаkovenko.
«Astana-Tazartý» JShS – BLUE POWER DIEZEL júıesin engizý arqyly qoldanystaǵy mamandandyrylǵan tehnıkalaryna jańǵyrtý júrgizgen qaladaǵy birden-bir kommýnaldyq kásiporyn. «Astana Tazartý» JShS bas dırektory Ivan Lavrınenko málimdegendeı, 3 aılyq synaq merzimindegi nátıje kóńil kónshiterlik. «Ár mashınadan shyǵatyn ekologııalyq qaldyqtar avtomatty túrde 0,12-den 0,02-ge azaıdy. Ekinshi bizdi qyzyqtyryp otyrǵan másele, jańa qondyrǵynyń kásiporynǵa tıgizetin ekonomıkalyq tıimdiliginde bolyp otyr. Jańa qondyrǵylar kásiporynǵa birqatar qarjy únemdeýge jaǵdaı jasaıdy. Únemdelgen bul qarajat qurylǵyny ornatý jumysyn aqtaıdy jáne park tehnıkalaryn taǵy da jańǵyrtýǵa múmkindik beredi. Bıyl biz osyndaı 7 jańa tehnıka alýdy josparlap otyrmyz. Bul árıne jumysymyzdy ońtaılandyrady. Jumys kestesinde kedergiler bolmaıdy jáne jańa jumys oryndary ashylady», deıdi kásiporyn basshysy.
Jylqybaı JAǴYPARULY,
«Egemen Qazaqstan».