Tilshiler qosynyna oblystyq ákimdiktiń baspasóz qyzmetinen telefon shalynyp, osynda qyzmet jasaıtyn bas maman lańkestik pen dinı ekstremızmge qarsy kúres komıssııasynyń otyrysyna qatysýymyzdy ótindi. Bardyq, qatystyq. Munda lańkestik pen ekstremızmge qarsy oń qoǵamdyq sana qalyptastyrý – bul baǵytta óńirlik buqaralyq aqparat quraldarynyń róli jóninde Batys Qazaqstan oblystyq ishki saıasat basqarmasynyń basshysy Aıgúl Esekenova jáne dinı ekstremızmniń aldyn alý jóninde Batys Qazaqstan oblystyq din isteri basqarmasynyń basshysy Talǵat Nyǵmetovter qaǵazdan bas almaı qur, jalań derekterdi tizbelep berdi.
Munyń ekeýi de qapelimde ishin ońaılyqpen aldyra qoımaıtyn, ekiniń biriniń tisi bata bermeıtin kúrdeli másele deýge bolady. Sondyqtan da bul arada pálenbaı adamdy qamtyǵan pálenbaı shara ótkizildi. Mynadaı is-sharalar jospary jasaldy. Osynshama aqparat – nasıhat toptary quryldy dep qolda bar derekterdi talǵamsyz túrde tizbeleı berýdiń qajeti shamaly bolsa kerek. Árıne, onyń báriniń qajettiligin joqqa shyǵarýǵa bolmaıdy. Basty másele tıisti taldaýlar men saraptamalar jáne salystyrýlar jasaı otyryp, atalǵan sharalardyń qandaı yqpaly bolǵanyna oı júgirtýde emes pe?!
Áıtse de, joǵaryda atalǵan basshylardyń aldyn ala jazylyp alynǵan derekterdi qaǵazdan bas almaı, sartyldatyp oqyp berýden ári asa almaı júrgenderi de batysqazaqstandyqtarǵa jaqsy belgili. Bul joly da solaı boldy. Sondyqtan da ony otyrysqa qatysqandar óte selsoq tyńdady. Al «tyńdalmasa sóz jetim emes pe?». Bizdiń oıymyzsha qaǵazdan bas almaý, tipti oǵan jabysyp aıyrylmaý – basshynyń tereń zerdeliligin, onyń oı-órisiniń bıiktigi men keńdigin tanyta almaıdy.
Búginde respýblıka oblystaryndaǵy ishki saıasat pen din isteri jónindegi jergilikti vedomstvolarǵa júktelip otyrǵan jaýapkershilik óte joǵary. Atalǵan qurylymdardyń qyzmetiniń júıeli ári nátıjeli bolýy kóp jaǵdaılarda ıirimderi men qııa-qaltarystary kóp osy salalardyń basy-qasynda júrgen jetekshilerdiń saraptamalyq qarym-qabiletiniń deńgeıi men tanym-túsinigine, qoǵamda ártúrli oı-pikirler týǵyzyp júrgen lańkestik pen dinı ahýal tóńireginde belgili bir qubylystyń oń nemese teris jaqtaryna adamdardyń kózderin jetkize bilýlerine baılanysty. Osy arada jergilikti jetekshilerdiń aldyn ala qaǵazǵa túsirilgen derekter tóńireginen asa almaı, adamdarmen tikeleı ári ashyq ún qatysýǵa kelýden keı jaǵdaılarda boı tasalap júretini de olardyń qyzmetiniń tıimdiligi men pármendiligin kótere almaıdy der edik.
Iá, biliktilik talaptary men kórinisteri jergilikti basshylardyń ózinen bastalǵanyna ne jetsin! Tek sonda ǵana olar óz qaraýyndaǵy mamandarǵa oń jol men ónege kórsete alary anyq. Alaıda, olardyń taptaýryndylyq pen birsaryndylyqtan jáne qaǵazdyń kómeginen árige asa almaı kele jatqany qynjyltpaı qoımaıdy. Álbette júrekten shyqpasa, júrekterge jetpeıdi emes pe?!
Temir Qusaıyn.
Batys Qazaqstan oblysy.
Foto: Yvision.kz.