Aqtóbe oblysynda 1 jas 9 aılyq Dılıara Tımýrqyzy saýsaq ushyndaı batareıka jutyp qoıdy. Onyń anasy Gúlnár Tóleýova jedel járdem shaqyrǵanymen, ondaǵy qyzmetkerler sábıge kelýden bas tartqan. Bul týraly Munara.kz habarlady.
Bul oqıǵa Muǵaljar aýdany Qandyǵash qalasynda oryn aldy. Balasynyń kenetten qaqalyp-shashalǵanyn baıqaǵan Gúlnár Tóleýova dereý jedel járdem qyzmetine qońyraý shalady. «Aýdandyq aýrýhanaǵa habarlasyp, mán-jaıdy túsindirdim. Olar biz bara almaımyz, ózderiń kelińder dep telefon tutqasyn qoıa saldy. Keıin balamdy taksımen apardym. Dárigerler balany qaraýǵa asyqpady»,-deıdi G. Tóleýova.
Aýdandyq aýrýhana qyzmetkerleri sábıdi rentgenge túsirgenimen, eshnárse taba almaǵan. Sosyn olar jutylǵan zattyń tańerteń balanyń úlken dáretimen birge shyǵatynyn aıtyp, sábı men anasyn úılerine keri qaıtaryp jiberedi. Arada bir kún ótkende, Gúlnár aýrýhanaǵa qaıta baryp, balasynyń tamaq qýysyn rentgenge túsirtedi. Sol kezde dáriger tıynnyń kólemindeı zatty baıqap, sábıin Aqtóbe qalasyna aparýǵa keńes bergen eken.
«Taksımen Aqtóbe qalasyna ákelgende keshki saǵat 5:00 boldy. Balalar aýrýhanasynyń dárigerleri 40 mınýt ota jasap, tıynnyń kólemindeı oıynshyq batareıkasyn alyp shyqty. Alǵashynda bári jaqsy boldy. Biraq, batareıkadan bólinip shyqqan ýly zat onyń ishki qurylysyn zaqymdap úlgergen. Sebebi, ol aýrýhanaǵa 18 saǵatqa keshiktirilip jetkizildi»,- deıdi G. Tóleýova.
Jalpy, Dılıaraǵa bir jarym aı ishinde bes ota jasalǵan. Endi ata-ana Dılıaranyń ólimine sebepker, der kezinde dıagnoz qoıa almaǵan aýdandyq aýrýhana dárigeriniń ústinen sotqa shaǵymdanbaqshy.
Ámirhan Almaǵanbetov.
Derekkóz: Munara.kz.
Foto: www. Sterlegrad.ru.