Atyraýda qazaqtyń tuńǵysh ushqysh qyzy, halyq qaharmany Hıýaz Dospanova atyndaǵy arnaýly stıpendııanyń alǵashqy ıegeri anyqtaldy. Bul týraly oblystyq ardagerler keńesiniń tóraǵasy Qatımolla Rızýanov habarlady.
Ekinshi dúnıejúzilik soǵysta áýege 300 ret kóterilip, jaýǵa qarsy urysta eren erliktiń úlgisin kórsetken qazaqtyń batyr qyzy Hıýaz Dospanovanyń esimin este qaldyrý maqsatynda qolǵa alynǵan ıgilikti sharaǵa oblystyq ardagerler keńesi uıytqy bolyp otyr. «Biz bul máseleni byltyrdan beri oılastyryp, demeýshiler izdestire bastaǵanbyz. Jaqynda demeýshilermen keńesip, Hıýaz Dospanova atyndaǵy arnaýly stıpendııany taǵaıyndaýdy uıǵardyq. Arnaıy qurylǵan komıssııanyń talqylaýynan keıin batyr atyndaǵy arnaýly stıpendııanyń alǵashqy ıegerin anyqtadyq»,- dedi Qatımolla Rızýanov.
Halyq qaharmany Hıýaz Dospanova atyndaǵy arnaýly stıpendııa H.Dosmuhamedov atyndaǵy Atyraý memlekettik ýnıversıtetiniń stýdenti Gúlnáz Jolboldyqyzyna berildi. Bir ereksheligi, áskerı ushqysh atyndaǵy stıpendııaǵa ıe bolǵan stýdent atalǵan ýnıversıtette «Alǵashqy áskerı daıyndyq» mamandyǵynda oqıdy. Oǵan oblystyq ardagerler keńesiniń tóraǵasy Q.Rızýanov arnaıy sertıfıkat pen stıpendııany tapsyrdy.
Joldasbek Shópeǵul.
Atyraý oblysy.
Derekkóz: Q. Rızýanov.
Foto: Avtor.