Keıde adamnyń taǵdyry óz esimimen sáıkes keledi. Árıne, ol – sırek kezdesetin qubylys. Myńdarǵa buıyrar baq. Áıtpese, talaı dúr esimdi ıelengenmen, ılenip júrgender qanshama?! Bizdiń keıipkerimizdiń atyn kim qoısa da, aýzy dýaly adam qoıǵan. Asylbolat dese, asyl bolat. Já, sózdi kóp sozbaıyq. Endigi áńgime – Qazaqstannyń eńbek sińirgen ártisi, arqaly akter, ánshi, sýretshi Asylbolat Smaǵulovtyń «Bekejan» róli jaıynda. Kezinde osy róline ataqty akter Káýken Kenjetaev: «Nızkıı poklon ı ogromnaıa blagodarnost molodomý akterý voplotıvshego, v realnost rol Bekejana» dep tánti bolypty.
Bala kúninen teatr ónerin jany súıgen talapty jas 1969 jyly Qurmanǵazy atyndaǵy konservatorııanyń teatr bólimine oqýǵa túsip, Qazaqstannyń halyq ártisi Hadısha Bókeevanyń sheberlik synybyna qabyldandy. Tórt jyl boıy bilikti mamannan tálim aldy. Áne-mine degenshe, oqý da támamdalýǵa jaqyn. Jas akterge Atyraý teatrynan usynys túsedi. Páterdiń de daıyn ekendigin aıtady. Biraq ol jańadan ashylǵan Arqalyqtaǵy jańa teatrǵa barýǵa bel baılaıdy. Torǵaı oblysy endi ashylǵan kez. Jan-jaqtan jınalǵan jalyndy jastar. Qazaq rýhanııatynyń qamqory О́zbekáli Jánibekov irgesin qalaǵan óner ordasynyń aty lezde tarady. Birinen-biri ótken talantty jas akterler legi keldi. Búginde teatr óneriniń tarlandaryna aınalǵan Meıirman Nurekeev, Janat Hadjıev, Sholpan Baıǵabylova sekildi daryndardyń alǵashqy óner joly sonda bastaldy. Solardyń arasynda almas qylyshtaı jarqyldap Asylbolat aǵa júrdi. Onda daryndy akterdiń daralyǵy birden baıqaldy. Jańa teatrdyń shymyldyǵy zańǵar jazýshy Muhtar Áýezovtiń «Aıman - Sholpan» pesasymen túrildi. Onda jas akter Álibektiń rólin oınap, jurtshylyqtyń yqylasyna bólendi. Arqalyq teatrynda on jylǵa jýyq talmaı eńbek etti. Esimi elge tanyldy. Oblys basshysy Erkin Áýelbekovtiń ózi jaqsy kórdi. Torǵaı eli jalyndy jasty qyransha túletti. Oblys jabylǵasyn Serke Qojamqulov atyndaǵy teatr ujymy tolyqtaı Jezqazǵanǵa kóshti. Bizdiń keıipkerimiz de sol teatrmen Qanysh Sátbaevtyń izi qalǵan shaharǵa qonys aýdardy.
Jezqazǵanda da atalǵan óner ordasynyń týy bıik boldy. Daryndy rejısser Janat Hadjıev sahnalaǵan kórnekti qalamger Ǵabıt Músirepovtiń «Qyz Jibek» spektaklin jurtshylyq joǵary baǵalady. Birde teatr ujymy gastroldik saparmen Almatyǵa barady. Bes-alty qoıylym usynady. Solardyń kóbinde bas keıipkerlerdi Asylbolat Smaǵulov oınady. Ásirese «Qyz Jibek» qoıylymyn kórgen kórermender akterler ónerine rıza boldy. Uzaq ýaqyt qol shapalaqtap qurmet kórsetedi. Zaldyń bári de «Bravo, Bekejan!» dep shýlap ketedi. Shyn máninde, bul beıne arqaly akterdiń ónerdegi baǵyn ashty. Oń jambasyna dál kelgen ról boldy. Sol kezde Káýken Kenjetaev sahnaǵa shyǵyp, joǵaryda keltirgen pikirin aıtqan eken. Bir ǵana Bekejan rólimen Smaǵulov Almatydaǵy teatr tarlandaryn moıyndatty.
Osydan biraz jyl buryn mesenattardyń respýblıkalyq «Tarlan» syılyǵyna usynylǵan kezde, kórnekti teatr synshysy Áshirbek Syǵaı: «Asylbolat «Tarlan» syılyǵyn alsa da – tarlan, almasa da – tarlan». О́ner jolynda sahnalyq hám ekrandyq tulǵalardy somdaýda asa talantty ekendigin únemi dáleldep kele jatqan ushqyndy akter. Operada Bekejandy Káýken Kenjetaev, kınoda Asanáli Áshimov qalaı somdasa, dramadaǵy Asylbolattyń Bekejanynan áli eshkim asa alǵan joq. Obraz psıhologııasyn tereńdeı uǵynyp, keıipker minez-qulqynyń názik ıirimderin móldirete asha biler arqaly sýretkerdiń shyǵarmashylyq orny bólek» dep laıyqty baǵasyn bergen.
Talantty akter 1998 jyly Qalıbek Qýanyshbaev atyndaǵy qazaq drama teatryna qyzmetke ornalasyp, birtýar rejısser Ázirbaıjan Mámbetovpen joly toǵysty. Ázekeń elordalyq teatr sahnasynda «Qyz Jibekti» qoıyp, Bekejan rólin Asylbolatqa oınatady. Sodan soń sahnada Balýan sholaqty somdady. Basqa da rólderdi beıneledi.
Asylbolat aǵa − segiz qyrly, bir syrly azamat. Qasıetti dombyrany pir tutady. Keı-keıde kókiregi muńǵa tolǵanda Abaı ánderin shyrqaıdy. «Júregińniń túbine tereń boıla, Men bir jumbaq adammyn, ony da oıla. Soqtyqpaly soqpaqsyz jerde óstim. Myńmen jalǵyz alystym, kiná qoıma!» dep hakim atamyz sekildi kúńirenedi. Gıtara men baıandy da bulbulsha quıqyljytady. Birqatar kórkem fılmge tústi. Sýretti de kelistirip salady. Ǵajaıyp syr tunǵan kartınalary kásibı qylqalam sheberinen esh kem emes. Týyndylarynan óziniń tabıǵaty kórinip turady. Men ol kisini kórgen saıyn oıymnan jazýshy Muhtar Maǵaýınniń «Ábdiǵapar seri» atty áńgimesi shyqpaıdy. Halqymyzdyń ǵajaıyp serilik dástúrin ustaǵan kerim azamatty Keńes ókimeti tabanǵa salyp, taptaıdy. Sonda bas keıipkerdiń: «Biz Aqan bola almadyq. Sán-saltanat quryp júre almadyq», dep kókiregi muńǵa tolady. Asylbolat aǵanyń da jany Ábdiǵapar serimen uqsas. Báribir, ol kisi sahnada ǵana emes, ómirde de Bekejan − bolmysty tulǵa ekendigin túsinesiz!