Batys Qazaqstan oblysynda jergilikti jastar basqarmasynyń usynysymen 18-22 sáýir aralyǵynda «Ulttyq qundylyqtar aptalyǵy» ótti.
Aptalyq aıasynda ótkizilgen is-sharalar oblys ortalyǵynda salt-dástúrimiz ben ádep-ǵuryptarymyzdy, ulttyq sport túrlerin, ulttyq qundylyqtardy dáriptep, merekelik án-shashýǵa toly boldy.
Mysaly, aptanyń bir kúni Murat Móńkeuly kóshesindegi saıabaqta turǵyndar arasynda asyq atý, arqan tartys syndy ulttyq oıyndardan jarys ótti. Osy jerde merekelik án shashý da uıymdastyryldy. Sporttyq saıysta jeńimpaz bolǵan belsendi jastarǵa estelik syılyqtar men dıplomdar tabys etildi.
Al Dına Nurpeıisova kóshesinde jastar gir tasyn kóterý men qol kúresinen synǵa túsip, Gracia shyǵarmashylyq sheberhanasy ulttyq buıymdardan kórme uıymdastyrdy.
20 sáýir kúni Rýhanı jańǵyrý mýzeıinde taqııa tigý men quraq quraýdan sheberlik saǵaty ótkizildi. Oraldyń sheber qyzdardy kózdi arbaıtyn kórkem ónerdiń qupııalarymen bólisti.
Eń qyzyqty sharanyń biri 21 sáýir, juma kúni ótti. Oral qalasyndaǵy eń uzaq baǵyt – Sarytaý-Et kombınaty aralyǵynda jolaýshy tasıtyn №2 avtobýsy «Jumadaǵy jaqsylyq aksııasy» aıasynda jolaýshylardy tegin tasydy ári Ramazan aıynyń qurmetine «Jarapazan» áni shyrqaldy.
Osynaý maǵynaly da mándi is-sharalardy uıymdastyrýǵa «Aqjaıyq jastary», «Oral jastary», «Shabyt» mektepten tys ortalyǵy, «BQO qazaq kúresi» qaýymdastyǵy, Fawaid.KZ dúkeni ujymy, t.b. atsalysty. Bul kúnderi Oral qalasynyń halyq kóp shoǵyrlanǵan jerlerinde qala turǵyndaryna ulttyq salt-dástúr jaıynda túrli suraq qoıylyp, túsindirý jumystary da júrgizildi.