Mańyzdy máseleler talqylanǵan máslıhat

«Nur Múbárak» Islam mádenıeti ýnıversıtetinde «Islamtaný jáne arab fılologııasy máseleleri» atty HI halyqaralyq ǵylymı-tájirıbelik konferensııa bolyp ótti. Basqosýda Bas múftı Erjan qajy Malǵajyuly baıandama jasady. Elbasynyń qamqorlyǵymen ashylǵan «Nur Múbárak» ýnıver­sıteti álemdik básekege qabiletti bedeldi oqý ordasyna aınalýy tıis ekenin aıtty. QMDB tóraǵasy Mysyr sapary aıasynda qol jet­kizgen jetistikter týraly baıan­dady. «Bizdiń osy saparymyzda Qazaqstannan keletin shákirtterdi Ál-Azharda jetildirý kýrsynan ót­kizsek degen ótinishimiz ma­quldandy. Budan bylaı, osy kelisim negizinde «Nur Múbárakta» oqıtyn 10 stýdentimiz Mysyrda bir jyldyq bilim jetildirý kýrs­ynda ilimderin tolyqtyratyn boldy», dedi Bas múftı. Erjan qajy Malǵajyuly «Nur Múbárak» tek ımamdardy daıyndap qana qoımaı, jas ǵalymdardy da ǵylymǵa beıimdeýi tıis ekenin qaperge saldy. Shákirt tárbıeleıtin ustazdardyń, ki­tap jazatyn ǵalymdardyń, bilikti aýdarmashylar tobyn qalyptastyrý qajettigin sóz etti. Stýdentterdi dinı ǵulamalardyń eńbekterin zertteýge úndedi. «San ǵasyrdan beri urpaqtan-urpaqqa jalǵasyp kele jatqan, dinimizben bite qaınasqan dástúrdi de tanyp-bilý, arnaıy pán retinde oqytyp, ony halyqqa jetkizý – basty jumystarymyzdyń biri. Endeshe, dástúrmen sýsyndaǵan urpaq eljandy bolyp ósedi. Shákirtterge tek bilim berip qana qoımaı, olardy parasatty, jaqsy azamat etip tárbıeleý – búgingi zamannyń talaby. Búgingi konferensııa jumysy shákirtter men ǵalymdardy osynaý izgilik pen ımandylyqqa, ǵylym jolyn tańdaýǵa úndeıdi degen senimdemin. Dástúrli basqosý nátıjeli bolǵaı! Konferensııa jumysyna sáttilik tileımin», dep sózin túıindedi Erjan qajy Malǵajyuly. Halyqaralyq jıynǵa BUU Qoǵamdyq aqparat departamentiniń ókili Vlastımıl Samek, Máskeý Islam ýnıversıtetiniń rektory Damır Haıretdınov, professor, fılologııa ǵylymdarynyń doktory Ábsattar Derbisáli, Mysyr mádenıet ortalyǵynyń dırektory Ashraf Dárýısh, Qazaqstan Din isteri agenttiginiń ókili Aınur Ábdirasylqyzy, t.b. ǵalymdar men oqytýshylar qatysty. Kon­ferensııany «Nur Múbárak» ýnı­versıtetiniń rektory, akademık Mahmud Fahmı Hıjazı júrgizdi. «Egemen-aqparat».