Sárýár sáýirde jyr marjany tógildi. Oblystyq S.Seıfýllın atyndaǵy qazaq drama teatrynda ult rýhanııatyna qatysty talaı ıgi bastamalarǵa muryndyq bolyp júrgen Qaraǵandy «Bolashaq» mańyzdy bilim berý kolledjiniń uıymdastyrýymen Qazaqstan Jazýshylar odaǵynyń múshesi, Halyqaralyq «Alash» ádebı syılyǵynyń ıegeri, «Aqtoǵaı aýdanynyń qurmetti azamaty», belgili aqyn Abzal Bókenniń «Tula boıym kóne sóz, kóne músin» atty shyǵarmashylyq keshi ótti.
Otyz jylǵa jýyq rýhanı astanamyz – Almatyda turyp, al asqaraly alpysynda Arqaǵa qonystanǵan Abzal aqyndy oqyrmandary zor qurmetpen qarsy aldy.
Poezııa keshinde aqyn A.Bókenge jan-jaqtan quttyqtaýlar quıyldy. Qazaqstan Jazýshylar odaǵy tóraǵasynyń birinshi orynbasary Ǵ.Jaılybaı bastap bir top qalamgerler keldi jyr keshine. Oblys ákimi Baýyrjan Ábdishevtiń quttyqtaý haty oqyldy. Oblystyq máslıhat hatshysy, ónerdiń úlken janashyry Nurlan Dýlatbekov pen Qazaqstan Jazýshylar odaǵy Qaraǵandy oblystyq fılıalynyń dırektory, halyqaralyq «Alash» ádebı syılyǵynyń ıegeri, aqyn Serik Aqsuńqaruly Abzal aqynǵa aqjarma tilegin arnap, shyǵarmashylyq tabys tiledi. «Bolashaq» kolledjiniń dırektory, ekonomıka ǵylymdarynyń kandıdaty Ǵaını Mamraeva shyǵarmashylyq ıesiniń ıyǵyna ata-baba jolymen oqaly shapan japty. Aqynnyń týyp-ósken shalqar besigi – Aqtoǵaı aýdanynan Q.Nókesh, M.Ońǵarqulov bastaǵan el aǵalary kelip, shaıyr shyǵarmashylyǵy haqynda ordaly oı qozǵady, Qazaqstannyń eńbek sińirgen qaıratkeri, aqynnyń jerles inisi Amantaı Jumashev ánnen shashý shashty.
Jas urpaqtyń sanasyna nurly shýaq syılaǵan jyr keshi Saryarqany ásem sazǵa bóledi. Jalyndy jyrlarymen oqyrmandarynyń júregine eldik pen erliktiń dánin ekken, qazaq poezııasynda aıshyqty qoltańbasy bar aqyn keshi «Toqyraýyn tolqyndary» ansambliniń oryndaýynda kesh ıesiniń sózine jazylǵan marqum D.Sádýaqasovtyń «Aqtoǵaı – altyn besigim» ánimen túıindeldi.
Ilııas DÚNGENBAIULY.
Qaraǵandy.