«Djaz Bend Almaty»

«Nıý-Iork djaz-sıtı» festıvalinde óner kórsetetin jalǵyz sheteldik orkestr bolmaq

Taıaýda Almatyda XIII Halyqaralyq Djaz festıvali bastaldy. Bes kúnge sozylatyn festıvaldi Tagır Zarıpovtyń jetekshiligindegi «Djaz Bend Almaty» orkestri men Túrkııadan kelgen Baky Dýıarlynyń kvarteti ashty. Mýzykalyq oqıǵaǵa oraılas kelgen taǵy jaǵymdy jańalyqtyń biri – «Djaz Bend Almaty» orkestri tuń­ǵysh ret «Nıý-Iork djaz-sıtı» fes­tıvalinde óner kórsetedi. AQSh-tyń Lınkoln ortalyǵynda 13 sáýirde bastalatyn asa bedeldi festıvalǵa qazaqstandyqtar alǵash ret qatysqaly otyr ári jalǵyz sheteldik ujym bol­maq. Bıletteri aldyn ala satylyp qoı­ǵan festıvalde kórermender bes kún boıy álemdegi eń áıgili djaz maı­talmandarynyń ónerine qol soǵady. Osy festıvalǵa Qazaq­stan atynan alǵash ret attanyp bara jatqan «Djaz Bend Almaty» orkestri №7 balalar mýzyka mektebiniń bazasynda qurylǵan bolatyn. Qazirgi tańda orkestrdiń úsh quramy bar. Osylaısha, jastardy mýzykaǵa baýlymaq bolǵan Tagır Zarıpovtyń bul bastamasy baıandy bolyp tur. Qazir atalmysh orkestr Almatydaǵy aıtýly mádenı sharalardyń kózaıymyna aınalyp keledi. Orkestr AQSh pen Nıderland elin aralap, Artýro Sandoval, Maıkl Breker, Pet Metenı, Deıv Holland ansambli sııaqty asa tanymal djaz mýzykanttarynyń ónerin tamashalap, tájirıbe baıytýda. Almatyda ótip jatqan XIII Halyq­aralyq Djaz fes­tıvaline kelsek, Shveısarııa, Germanııa, Fransııadan belgili djaz toptary óner kórsetýde. Oǵan qosa, tuńǵysh ret Qazaq ulttyq óner ýnıversıtetiniń Bıg Bend jáne «Dervıshı» tobynyń «Vostochnyı Ekspress» etno toby tartylǵan. Bıyl bir múshelge tolǵan bul mádenı sharaǵa Almaty qalasynyń ákimdigi men Túrkııa, Shveısarııa, Germanııa jáne Fransııa elshilikteri turaqty qoldaý kórsetip keledi. Al bıylǵy «Nıý-Iork djaz-sıtı» festıvaline shaqyrylyp otyr­ǵan jalǵyz sheteldik orkestr – «Djaz Bend Almatyǵa» jetekshilik etetin Tagır Zarıpov Almatydaǵy «XIII Halyqaralyq Djaz merekesi» festıvaliniń ǵana emes, búkil Ortalyq Azııa boıynsha jalǵyz djaz mektebiniń negizin qalaǵan adam. Bul mektep 2000 jyly ashylǵan. Atalmysh mýzyka ordasynda 190 oqýshy bilim alyp jatyr. Onda  jazdyq solfedjıo, djaz tarıhynan pánder ótiledi. Oqý merzimi – mýzykalyq aspaptardyń kúrdeliligine baılanys­ty 5-7 jyl. – Almatyda bıyl 13 ret ótkizi­lip otyrǵan «Halyqaralyq Djaz me­reke­si» festıvalinde sheteldik óner maı­talmandary mektebimizde tegin sheberlik dáristerin ótkizedi. 13 jyl ishinde bizdiń festıvalde 300-den astam sheteldik mýzykanttar óner kórsetti. Jas mýzykanttardy tárbıeleýde festıvaldiń alatyn orny zor, – dedi   Tagır Zarıpov. Aınash ESALI, «Egemen Qazaqstan». ALMATY.