Bizdiń aýyldyń shetinde hrıstıandar zıraty ornalasqan. Munda jerlengenderdiń deni – ótken ǵasyrdyń 60-jyldary tyń ıgerý kezeńinde aýylǵa qonys tepkenderdiń urpaǵy. Kópti kórgen qarııalar aýyl qurylǵan ýaqytta ýkraın, belorýs jáne chývash ulty ókilderiniń jergilikti turǵyndarymen etene aralasqanyn aıtyp otyratyn.
Álgi zıratta Vovka (aýyldaǵylar osylaı atap ketken, shyn esimi Vladımır) esimdi azamat máńgilik uıqyda jatyr. Ony bilgen, kórgen adamdar «úı-kúıi joq, araqqa qumar, aýyldyń malyn baqqan edi» dep mensinbeýshilikpen eske alar edi. Biraq men onyń jasaǵan is-áreketterine kóz júgirtip, ózgeshe oıǵa beriletinim bar. «Vovka qaıtys boldy» degen habardy estigende, jaqyn týysymnan aıyrylǵandaı kúı keshkenim ras.
Vovka talaı jyl aýyldyń qoıyn baqty. Mektep qabyrǵasynda júrgen kezim. Birde onyń tamaq salynǵan qapshyǵyna kózim tústi. Ishinen eki-úsh kitaptyń muqabasy kórindi. Kitaptardy qolyma ala bergende, kózime ottaı basyldy: Jurt jamandaıtyn álgi Vovkań Ilııas Esenberlınniń «Kóshpendiler» trılogııasynyń oryssha nusqasyn oqyp júr eken (Vovkanyń qazaqshasy onsha emes edi). Qoı baqqan kezde ermek qylady ǵoı. Surastyrsam, kitaptardy aýyl kitaphanasynan jazdyryp alatyn kórinedi. Al «aýyldyń keıbir aıtqyshtary» kitap oqý bylaı tursyn, kitaphanaǵa aıaq basyp kórsin. Kitap oqý máselesine kelsek, jastardyń da jaǵdaıy máz emes. Vovkany jaman dep kór endi.
Búginde qaı aýyldy alyp qarasań da, jergilikti jerdiń ótkeni jaıly tarqatyp aıtar aqsaqaldardyń qatary sıregen. Keıde qarııalardyń ortasynda otyryp, áserli áńgime tyńdaǵyń kep qulshynyp otyrasyń. Átteń... Vovka áńgimeniń sheberi edi. Áńgimesin «Iа ne ponıal» dep bastaıtyn-dy. Jan-jaqty edi jaryqtyq. Qaı salany bolsyn, shama-sharqynsha qyzyqty etip aıtyp beretin. Tipti bilgeninshe aýyldyń tarıhyn tarqatyp, kim-kimge qalaı týysatynyn jatqa biletin. Onyń áńgimesinen keıin kóńil kókjıegi kóterilip qalatyn edi. Aýyl meshitiniń birqatar qurylys jumysyna Vovkanyń eńbegi sińdi deýge ábden bolady. Aqshaǵa jaldanyp istese de, ár sharýany tııanaqty atqaratyn. Meshit jumystaryna asar jasalǵan ýaqytta aýyldyń tepse temir úzer keıbir jigitteri úıinde dóńbekship jatqanda, Vovka saýaby mol isten qalys qalmaıtyn.
Búginde bireýdiń boıyndaǵy kemistikti kórse, muryn shúıire qaraıtyndar az emes. «Kedeısiń» dep kemitetinder de jeterlik. Mal baǵýshy bolsyn, ot jaǵýshy bolsyn, mekeme basshysy bolsyn, báriniń de Alla aldyndaǵy dárejesi bir. Baýyrmal bolaıyq, aǵaıyn!