Sátbaev qalasynda ulttyq aspaptarda oınaýshylar arasynda ótken Erden Sandybaıuly atyndaǵy IV respýblıkalyq baıqaýda Nazerke Ábilhasenova birinshi oryndy jeńip aldy. Alty jyl buryn alǵash ret jalaýy jelbiregen bul óner dodasynda bıyl 16-40 jas aralyǵyndaǵy 31 ónerpaz baq synady.
Nazerke Ábilhasenova Qaraǵandydaǵy mamandandyrylǵan mýzyka mektep-ınternatynyń 11-synybynda oqıdy. Onyń tańdaǵan aspaby – qylqobyz.
– Qatysýshylar arasynda konservatorııa oqytýshylary, tájirıbeli mýzykanttar bolǵandyqtan, basynda qatty qobaljyǵanym ras. Áıtse de, sátin salyp, segiz nómirden turatyn baǵdarlamamdy jaqsy oryndap shyqtym. Ár týrǵa tórt týyndydan oınadym. Jeńemin degen senim bolmasa da, barymdy saldym, – deıdi ol aǵynan jarylyp.
Nazerke mektepti bitirgen soń qaı oqý ornyna baratynyn áli sheshpepti. Degenmen ol óziniń bolashaq ómiri mýzykamen baılanysty bolatynyna senimdi.
Al tóreshiler alqasynyń sheshimimen baıqaýdyń bas júldesi almatylyq ónerpaz Ásel Qaldymuratqa buıyrdy. Ekinshi júlde Qaraǵandy men Sátbaev qalalarynan qatysqan eki ónerpazǵa berilse, Almaty men elordadan kelgen úsh qatysýshy júldeli úshinshi oryndy ózara bólisti.
Jeńimpazdar men júldegerler dıplomdarmen jáne aqshalaı sertıfıkattarmen marapattaldy.