L.N.Gýmılev atyndaǵy Eýrazııa ulttyq ýnıversıtetinde bos jumys oryndarynyń jármeńkesi ótti. Jármeńkede jumys izdegen de, jumysshy izdegen de kóp.
Atalǵan joǵary oqý ornynyń uıymdastyrýymen ótken is-sharada elordadaǵy oqý oryndarynyń bitirýshi stýdentteri men ózge óńirlerden kelgen jumys berýshiler de bar. Bári de ózine laıyq jumys izdeıdi. Al ýnıversıtettiń maqsaty – túlekke jumys, jumys berýshige qyzmetker tabýǵa sebepker bolý. Is-sharany uıymdastyrýshylardyń biri, L.N.Gýmılev atyndaǵy EUÝ «Kólik-energetıka» fakýltetiniń dekany Tynys Súleımenov: «Osy jármeńkege 40-tan asa jumys berýshi keldi. Úlken artrıýmda eki sheńber bolyp otyr, jumys isteımin degen adamǵa laıyqty jumysshy izdegen mekeme jetkilikti. Sonyń ishinde iri uıymdardan bólek, jańa, zamanaýı mekemelerdiń kelgeni de qýantady. Bastysy, túlekter jumys taýyp alsa degen nıettemiz. Mysaly, ózim oqytqan sala boıynsha búgin kelgen Astanaenergosbyt ókilderine baryp, «Jylý energııasy» mamandyǵymen 110 stýdent bitiretinin, olardy jumyspen qamtýǵa múmkindiktiń bar-joǵyn surap edim, bárine oryn tabylatynyn, maman asa qajet ekenin aıtyp otyr. 4 jyl oqyp, mamandyq alǵannan keıin sonysyn aqtap, jumysqa ornalasyp ketkenin qalaımyz», dedi.
Jumys berýshilerdiń arasynda bilim berý salasynyń uıymdary kóp kórindi. Memlekettik mektepter de, jekemenshik orta bilim berý uıymdary da, oqý ortalyqtary da bar. Sonyń biri – respýblıkalyq fızıka-matematıka mektebi. Bul mektepke fızıka pániniń muǵalimi men zerthanada jumys isteıtin laborant kerek eken. «Joǵary oqý oryndarynyń bitirýshi stýdentteri nemese magıstranttary arasynan ózimizge bilikti mamandardy tańdap alý maqsatynda osy jármeńkege kelip otyrmyz. Laborant fızıka páninen zerthanalyq jumystar júrgizýge kómektesýi kerek. Fızıka mamandyǵy boıynsha bakalavr nemese magıstr dárejesiniń bolýy talap etiledi. Al fızıka pániniń muǵalimine pedagogıkalyq mamandyqty bitirgen bolýy shart. Dıplomynda pedagogıka jáne psıhologııa pánderiniń oqyǵany kórsetilýi tıis», deıdi respýblıkalyq fızıka-matematıka mektebiniń ókili Dýman Kenjealın. Muǵalim men laboranttyń jalaqysyn suraǵanymyzda mektep ókili suhbat kezinde aıtylatynyn jetkizdi.
Biz kóbine shet tilin, sonyń ishinde aǵylshyn, qytaı tilderin meńgergenderge jumys tabýdy ońaı dep bilemiz. Sóıtsek, olaı emes eken. Doktorantýrada bilim alyp júrgen Qahar Qaırat aǵylshyn, qytaı tilderin erkin meńgerse de jumys tabý qıyn ekenin aıtady. «Men «Aımaqtaný» mamandyǵy boıynsha 3-kýrs doktorantymyn. О́z mamandyǵyma sáıkes jumys izdep júrmin. Doktorantýrada oqıtyndarǵa bıyl stıpendııany 170 myń teńgege kóbeıtti, biraq mundaı qarajatqa otbasyn asyraı almaımyn. Sondyqtan sabaǵyma qosymsha ártúrli ortalyqtarda aǵylshynnan sabaq berip júrdim. Biraq jeke ortalyqtarda jazdygúni jumys bolmaı qalady. Sol sebepti turaqty jumysqa ornalassam deımin. Qazir jumyssyzdar, bos oryndarǵa kandıdattar kóp. Jumys tabý eki shet tilin erkin meńgergen meniń ózime qıyn. О́ıtkeni kóp jer orys tilin bilýdi talap etedi. Men Qytaıdan kelgen qazaqpyn, orys tilin oqymaǵanmyn. Al elshilikterge jumysqa tanyssyz ornalasý tipti múmkin emes», deıdi Q.Qaırat.