Memleket basshysynyń Konstıtýsııaǵa ózgerister engizý jóninde referendým ótkizý týraly bastamasy Ata Zańymyzda jazylǵan basty qaǵıdaǵa negizdelgen.
Qazirgi Konstıtýsııamyzda «memlekettik bıliktiń birden-bir bastaýy – halyq» dep, naqty ári túsinikti jazylǵan. Osy qaǵıdaǵa súıenetin bolsaq, Ata Zańymyzǵa engiziletin kez kelgen ózgeristi jalpyhalyqtyq referendým arqyly halyqpen keńese otyryp qabyldaý kerek. Sondyqtan men Prezıdentimizdiń bul bastamasyn tolyq qoldaımyn.
Bul usynys el Prezıdenti jarııalaǵan «Halyq únine qulaq asatyn memleket» tujyrymdamasyn iske asyrýdyń laıyqty jalǵasy. Osylaısha, Qasym-Jomart Toqaev elimizdi jańartý jáne Jańa Qazaqstan qurý baǵytyndaǵy ózi belgilegen bastamalardy júıeli túrde jalǵastyryp otyr.
Ashyǵyn aıtqanda, biz halyqpen keńesip, pikirlesý jaǵyn sál esten shyǵaryp aldyq. Elimizde shırek ǵasyrdan astam ýaqyt boıy birde-bir referendým bolǵan joq. Dál qazir halyqtyń qoldaýy Qasym-Jomart Kemelulyna ózi bastaǵan saıası, ekonomıkalyq jáne áleýmettik reformalardy iske asyrý jolynda batyl qadamdar jasaýǵa jol ashady. Konstıtýsııany jańartpaı ádiletti, Jańa Qazaqstan qurý múmkin emes. Aldaǵy referendýmda halyq óziniń salmaqty sózin, salıqaly pikirin bildiredi dep senemin. Ol úshin tek halyqtyń únine qulaq túrý qajet.
Muhtar QUL-MUHAMMED,
Senat depýtaty