Qazaqtyń qoldaýshysy da, qamqorshysy da – qazaq. Este joq eski zamannan beri jesirin de, jetimin de jylatpaǵan halyqtyń búgingi urpaǵy sol úrdisti jalǵastyryp keledi.
Aılardyń sultany – Ramazandaǵy Qadir túni qarsańynda Jylyoı aýdanynyń munaıshylary asyraýshysynan aıyrylǵan otbasyǵa qaıyrymdylyq kómek kórsetti. Olar aýdan ortalyǵy – Qulsary qalasynda turatyn kópbalaly ana Nurgúl Ǵabdolovaǵa eki bólmeli páter satyp alyp berdi. Shyndyǵynda bes balasy bar ana mundaı kómekke zárý edi. Onyń kúıeýi qaıtys bolǵan. Qazir balalaryn ózi tárbıelep otyr. Balalarynyń úsheýi – oqýshy, ekeýi áli mektepke barmaǵan. Úlken qyzy týberkýlezge qarsy dıspanserdiń esebinde tur. Biraq eshkimniń aldyna alaqan jaıyp barmaǵan. Qaltaly kásipkerlerden kómek suramaǵan. Osy kezge deıin kópbalaly otbasy baspana jaldap kelgen.
– Jylyoı aýdanynan «qara altyn» óndiretin «Jylyoımunaıgaz» basqarmasynyń munaıshylary kópbalaly otbasyna kómek kórsetý úshin erikti túrde qarajat jınaý bastamasyn kóterdi. Jınalǵan qarajatqa Qulsary qalasynan eki bólmeli páter satyp alyndy. О́tken jyly munaıshylardyń osyndaı demeýshiligimen Dossor kentinen úsh úı, Qulsary qalasynan bir páter satyp alynǵan edi. Mundaı ıgilikti is bıyl da jalǵasyn taýyp otyr, – deıdi «Embimunaıgaz» AQ basqarma tóraǵasynyń orynbasary Rysty Tasmaǵambetova.
Munaıshylar kópbalaly otbasyǵa syıǵa berilgen páter ornalasqan úıdiń dálizine jóndeý júrgizdi. Al qonys toı ıesine kilem tartý etti.