Sońǵy jyldary memlekettik qoldaý arqyly tyńǵa túren salyp, táýekel etýdiń nátıjesinde tabysqa qol jetkizip otyrǵandardyń sany birshama kóbeıe túsken. El ishindegi osy bir ıgilikti sharýa talpynǵan jannyń áleýmettik-turmystyq jaǵdaıyn jaqsartýǵa yqpal etip keledi.
Aýdanda sońǵy tórt jyl kóleminde «Bıznes bastaý» jobasy aıasynda 324 adam arnaıy oqýdan ótken. Bul buryn beımálim bolyp kelgen, synaǵy aýyr, syry mol bıznes áleminiń qyr-syryn meılinshe meńgertýge septigin tıgizgen shara edi. Jumys isteımin dep talpynǵan janǵa kásiptiń az emes ekeni belgili. Ásirese tabıǵaty tamyljyǵan Sandyqtaý aýdanynda aýyl sharýashylyǵy, týrızm salasynda múmkindik az emes. Aqtyly mal baǵyp, aqyq dán terbetýge ábden bolady. Halyqqa qyzmet kórsetý salasynda da suranys jetip artylady. Tek qana adal eńbegimmen yryzdyǵymdy molaıtamyn degen ynta bolsa jetkilikti. Osy oraıda memleket tarapynan zor kómek kórsetilip otyrǵanyn aıta ketýdiń artyqtyǵy bolmas.
Arnaıy kýrstan ótip, bıznes álemine qajetti bilimmen qarýlanǵan 115 adam jeńildetilgen nesıe alyp, óz kásibin dóńgeletip otyr. Oıǵa alǵan sharýalary ońynan ońǵarylsa az dúnıe emes. Isin jańa bastaǵan kásipkerlerge 400 mln teńge kóleminde qarajat berilgen. Ánsheıinde is bastaýǵa alǵashqy qarjymyz joq dep daǵdaryp otyrǵandar úshin aıta qalarlyqtaı kómek emes pe? Qamqorlyqpen qanattanǵan jannyń biri – aýdan turǵyny Gaýhar Tileýbaeva. Aldymen aýdan ortalyǵyna neniń qajet ekenin saraptaǵan. О́ziniń oıynsha, ótimdisi – azyq-túlik.
– Kıim-keshektiń, ózge de buıymnyń jyldam óte qoımaýy múmkin, – deıdi kásipker, – al azyq-túlik kúndelikti tutynylady. Jobany daıyndaǵan kezde jańylyspaǵan ekenmin. Alǵashqy bette jumysymdy jolǵa qoıýǵa septigin tıgizip otyr. Byltyr 6 paıyz ósimmen 3 mln teńge jeńildetilgen nesıe aldyq. Aldaǵy ýaqytta dúkende satylatyn azyq-túliktiń túrin tutynýshylardyń suranysyna qaraı kóbeıte túsýdi kózdep otyrmyz.
Osyndaı memlekettik baǵdarlamalar talaby bar jannyń tabysyn eselep, óz kásibin dóńgeletýge múmkindik berse, ekinshi jaǵynan el ishindegi jumyssyzdyqtyń azaıýyna septigin tıgizbek. Aýdanda memlekettik baǵdarlamalardyń nátıjesinde jumyssyzdar sany jyldan-jylǵa qysqaryp keledi. Jumysyn jańa bastaǵanymen, isi alǵa basqan kásipkerlerdiń talpynysyn kórip, ózgelerdiń de umtylatyndary anyq.
– Byltyr 615 adam jumysqa ornalasty, – deıdi aýdandyq jumyspen qamtý ortalyǵynyń qyzmetkeri Almas Baltashev, – ortalyqqa kómek surap kelgen adamdardyń barlyǵyn jumyspen qamtyp otyrmyz. Jyl basynan beri ótinish berip jatqandar da jeterlik. Eń bastysy, jergilikti jerde adamdardyń jumys isteımin degen yntasy bar. Ynta bolsa, alynbaıtyn qamal joq.
Aýdan boıynsha sońǵy tórt jyl ishinde 183 kásipker memlekettik grantqa ıe boldy. Olarǵa 80 mln teńge kóleminde qarajat bólingen. Aldaǵy ýaqytta da ilkimdi iske uıytqy bolatyn sharýa jalǵasa bermek.