Pavlodar qalasynyń 27 jastaǵy turǵyny 4 kúnnen beri tabylmaı jatyr, dep habarlaıdy Egemen.kz.
27 jastaǵy Darhan Baıtoktyń anasy polısııa qyzmetkerlerine 30 sáýir kúni kelip, kómek suraǵan. Onyń aıtýynsha uly sol kúni saǵat 3:00-den beri habarsyz ketken.
Polısııa qyzmetkerleri jedel-tergeý tobyn quryp, óńirdegi búkil aýmaqtyq bólimshelerge, sondaı-aq oblystardyń polısııa departamentterine habar berdi.
«Birinshi kúnnen bastap joǵalǵan adamdy tabý úshin izdestirý sharalary júrip jatyr. Iesiz úıler, elsiz jerler, sý aıdyndary, qamys qopalary, shalǵyndar, saı-shuńqyrlar, aýyl shetindegi jerler, qaraýsyz qalǵan qurylystar, pishen saraılary qaralǵan. Dalaly jerlerdi sholýǵa kvadrakopter qoldanyldy. Polısııada profılaktıkalyq esepte turǵan adamdardyń turatyn jeri tekseriledi. Bul jumysqa eriktiler men janashyr azamattar, aýyl turǵyndary qosyldy. Izdeý jumystary jalǵasyp jatyr», dep jazylǵan polısııanyń habarlamasynda.