Mıneraldyq-shıkizat bazasyn tolyqtyrý, geologııalyq zerdeleýdi arttyrý, jumys istep turǵan óndiris oryndaryn shıkizatpen qamtamasyz etý jáne jańa óndiris oryndaryn qurý maqsatynda Indýstrııa jáne ınfraqurylymdyq damý mınıstrligimen jer qoınaýyn paıdalaný quqyǵy beriledi, dep habarlaıdy Egemen.kz.
Bul týraly Úkimet otyrysynda baıandama jasaǵan Indýstrııa jáne ınfraqurylymdyq damý mınıstri Qaıyrbek О́skenbaev málimdedi.
2021 jyldyń qorytyndysy boıynsha bul maqsatta 1700-den astam lısenzııa berilip, 800-ge jýyq otandyq ıýnıorlyq kompanııa qurylǵan. Búginde jumys istep turǵan óndiris oryndaryn shıkizatpen qamtamasyz etý úshin otandyq bıznes ókilderi ken oryndaryn barlaý boıynsha mindettemeler alyp otyr. Jalpy 2018 jyldan bastap jer qoınaýyn paıdalaný salasyna shamamen 7 trln teńge ınvestısııa tartylǵan. Jyl saıyn 38,6 mln tonna temir rýdasy, 1,4 mln tonna alıýmınıı totyǵy óndiriledi, sondaı-aq 2,7 mln tonna mys konsentraty men 193 myń tonna qorǵasyn konsentraty shyǵarylady.
«Memleket basshysynyń tapsyrmasyna sáıkes qazir barlyq ken ornyn tekserip jatyrmyz. Búginde qatty paıdaly qazbalar boıynsha jer qoınaýyn paıdalaný salasynda 499 kelisimshart jáne 1738 lısenzııa iske asyrylýda. Jer qoınaýyn paıdalanýǵa buryn-sońdy berilgen qoldanystaǵy barlyq kelisimshart pen lısenzııalarǵa taldaý jasaldy. Bul 2 myńnan astam qujat. Osylaısha, 118 lısenzııanyń qoldanylýy toqtatyldy. Taldaý qorytyndysy negizinde qoldanystaǵy 1620 lısenzııa boıynsha tıisti sharalar qabyldanatyn bolady», dep atap ótti Qaıyrbek О́skenbaev.
Endigi kezekte mindettemelerdi oryndaý kórsetkishteri 100 paıyzdan tómen sanalatyn jer qoınaýyn paıdalanýshylar tekseriletin bolady.
Mınıstrdiń aqparatyna sáıkes, jańa sharttar boıynsha árbir jer qoınaýyn paıdalanýshy óńirlik áleýmettik jobalarǵa qatysyp, jańa óndiris oryndaryn quratyn bolady. Sonymen birge, jumys istep turǵan óndiristerdi jańǵyrtyp, qosymsha jumys oryndaryn ashady jáne otandyq óndiristik kásiporyndardy shıkizatpen qamtamasyz etedi.
Aıta ketsek, Indýstrııa jáne ınfraqurylymdyq damý mınıstrligi Ekologııa mınıstrligimen birlesip, Qazaqstan jer qoınaýyn paıdalaný úshin qoljetimdi barlyq aýmaqty memlekettik jer qoınaýy qoryn basqarý baǵdarlamasyna qosý máselesin pysyqtap jatyr. Bul geologııalyq barlaý jumystaryn jandandyrý, sondaı-aq qatty paıdaly qazbalar men keń taralǵan paıdaly qazbalar boıynsha paıdalanylmaıtyn ken oryndaryn ıgerý maqsatynda qolǵa alynǵan shara.