Ekinshi aınalymda súrindi
Erler jáne áıelder arasyndaǵy Qazaqstannyń birinshi raketkalary Aleksandr Býblık pen Elena Rybakına Madrıdte ótip jatqan masters týrnıriniń birinshi jáne ekinshi kezeńinde jeńilip qaldy.
Álemniń 33-raketkasy Aleksandr Býblık Madrıdtegi týrnırdiń alǵashqy aınalymynda reıtıngte ózinen bir saty joǵary turǵan serbııalyq Mıomır Kesmanovıchpen sheberlik baıqasty. Buǵan deıin qarsylastar ózara bir ret kezdesip, byltyr elorda ótken týrnırde Býblık 2:6, 6:3, 7:5 esebimen jeńiske jetken bolatyn. Bul joly serbııalyq sportshynyń mereıi ústem boldy. Birinshi partııanyń sheshýshi sátinde breık jasaǵan Mıomır 6:4 esebimen jeńiske jetti. Kesmanovıch ekinshi sette de sol qarqynynan jańylǵan joq – 7:5.
Áıelder arasyndaǵy dúnıejúzilik reıtıngte 18-orynda turǵan Elena Rybakına úshinshi aınalymda álemniń 35-raketkasy shveısarııalyq Hıl Belen Taıhmanmen kúsh synasty. Qarsylastar buǵan deıin bir-birimen kortta kezdespegen bolatyn. Shveısarııalyq tennısshi birinshi partııada 6:3 esebimen basym tússe, ekinshi sette de sol qarqynyn joǵaltqan joq – 6:1. Bir saǵat 16 mınýtqa sozylǵan match barysynda Elena 6 eıs jasaǵanymen, 6 breık-poınttyń birde bireýin paıdalana almady.
Alǵashqy fınalıst anyqtaldy
Anglııanyń «Lıverpýl» klýby Chempıondar lıgasynyń jartylaı fınalynyń jaýap matchynda Ispanııanyń «Vılıarrealyn» 2:3 esebimen jeńip, óz tarıhynda 10-shy márte týrnırdiń fınalyna joldama aldy.
«Enfıld Roýd» stadıonynda ótken jartylaı fınaldyń alǵashqy oıynynda «Lıverpýl» 2:0 esebimen basym túsken bolsa, kúni keshe «Estadıo-de-la-Keramıkada» uıymdastyrylǵan qarymta kezdesýde qonaqtar taǵy da alań ıelerin qapy qaldyrdy – 2:3. Birinshi taımnyń 3-mınýtynda «Vılıarreal» fýtbolshysy Býlaı Dıa esepti ashsa, 41-mınýtta Fransıs Koklen tablodaǵy kórsetkishti 2:0-ge jetkizdi.
Alaıda ekinshi taımda Iýrgen Klopp Jotanyń ornyna Dıasty alańǵa shyǵaryp, oıyn barysyn 180 gradýsqa ózgertip jiberdi. Nátıjesinde, Mersısaıd fýtbolshylary aınaldyrǵan 12 mınýttyń ishinde úsh gol soǵyp, tarazy basyn ózderine aýdardy. Gol avtorlary – Fabıno (62-mınýt), Dıas (67) jáne Mane (74). Osylaısha, «Lıverpýl» Chempıondar lıgasynyń alǵashqy fınalısi atandy.
«Barys» Volkpen qoshtasty
Qurlyqtyq hokkeı lıgasynda (QHL) óner kórsetetin elordanyń «Barysy» kelisimsharty aıaqtalǵan legıonerimen qoshtasa bastady.
Maýsym qorytyndysy boıynsha komandadan alǵashqylardyń biri bolyp «Barysta» tórt jylyn ótkizgen Qazaqstannyń azamattyǵyn alǵan kanadalyq Kertıs Volk ketti. 2018 jyly elordaǵa qonys aýdarǵan shabýylshy búginge deıin «Barys» sapynda 233 oıynǵa qatysyp, 41 márte mergendigimen kózge túsken. Sonymen qatar áriptesterine 90 ret nátıjeli pas asyrǵan.
Sondaı-aq aldaǵy ýaqytta Olle Alsıng, Iаkob Berglýnd, Lınden Veı, Kodı Kýnık, Iаkob Lılıa, Erık Martınsson, Djo Morroý, Ionı Ortıo, Roman Savchenko, Roman Starchenko, Tomash Iýrcho erkin agent retinde komandadan ketýi múmkin.