Senat tóraǵasy Máýlen Áshimbaev bıýdjet qarjysyn ońdy-soldy shasha bermeı, tıimdiligin arttyrý qajettigin aıtty, dep habarlaıdy Egemen.kz.
Senat tóraǵasy Máýlen Áshimbaev 2022–2024 jyldarǵa arnalǵan respýblıkalyq bıýdjetke ózgerister men tolyqtyrýlar engizetin zańdy qaraý barysynda osylaı dedi. Senat tóraǵasy, respýblıkalyq bıýdjetti qalyptastyrýda jańa tásilder kerektigin aıtty. Bólinetin qarjy men josparlanǵan jumystyń nátıjesi naqty bolýy mańyzdy. Sondyqtan bul máseleni depýtattar baqylaýda ustaıtyn boldy.
Sondaı-aq Máýlen Áshimbaev, qazirgi shyǵyndardy Ulttyq qordan emes, respýblıkalyq bıýdjetten qarjylandyrý kerek dep esepteıdi. Aıta ketsek, búgingi túzetýler aıasynda sáýir aıynan bastap zeınetaqy men áleýmettik tólemder qosymsha 4 paıyzǵa artady. Jalpy zeınetaqynyń ortasha mólsheri ótken jylmen salystyrǵanda 11 prosentke ósedi.
«Bıýdjetti qalyptastyrý ashyq ári tıimdi júrýi tıis. Respýblıkalyq bıýdjettiń ár teńgesi orynymen bólinip, tıimdi jumsalýy tıis. Ulttyq qordyń da qarjysyn durys paıdalanǵan jón. Bıýdjet defısıtin syrttan qaryz alyp qarjylandyrý máselesin de pysyqtaǵan abzal. Qaryzdy kóbeıte bermeı, bar qarajatty durys paıdalaný qajet. Sondyqtan bıýdjetti qaraǵan kezde nátıje bermeıtin naýqandyq sharalardy qarjylandyrýǵa jol berilmeýi kerek», deıdi Senat tóraǵasy.