Qyzylorda qalasyndaǵy Qyzyljarma aýylynda ornalasqan № 55/47 áskerı bóliminde oqys oqıǵa oryn aldy. 13 sáýir kúni tańerteń bir sarbaz komandırine dene qyzýynyń kóterilip, basy aınalyp, júregi aınyp, álsizdik bolǵanyn aıtqan. Jedel-járdemmen aýrýhanaǵa jetkizilgende sarbazdyń ýlanǵany anyqtalǵan. Atalmysh oqıǵadan soń áskerı bólimde osyndaı dıagnozben aýyrǵan sarbazdardyń sany artqan. Aqyry 35 sarbaz ben 1 ofıser juqpaly aýrýlar aýrýhanasyna túsken.
Sarbazdardyń ýlanýyna qatysty oblystyq juqpaly aýrýlar aýrýhanasynyń bas dárigeri Qaragóz Balabekova men № 55/47 áskerı bóliminiń tárbıe isi jáne áleýmettik máseleler jónindegi orynbasary Evgenıı Pak baspasóz máslıhatyn ótkizdi. Munda aýyz toltyryp aıtarlyqtaı aqparat jarııalanǵan joq. Minberden sóz alǵan kisiler sarbazdardyń neden ýlanýy múmkin ekenin, jappaı ýlaný sıpatynyń nelikten beleń alǵanyn aıtpady. Dál qazir tekserý jumystarynyń júrip jatqanyn baıan etip, máseleniń mán-jaıy aldaǵy birer kúnde belgili bolatynyn jetkizdi.
– Aýrýhanaǵa alǵashqy túsken sarbazdardyń jaǵdaıy qalypty. Al keıinnen kelgen jaýyngerlerdi emdep jatyrmyz. Barlyq sarbazdan qajetti synamalar alyndy. Búginde epıdımolog mamandar tekserý jumystaryn júrgizip, jappaı ýlanýdyń neden bolǵanyn anyqtaýǵa kúsh salýda, – dedi bas dáriger.
Al áskerı bólim basshysynyń orynbasary sarbazdarǵa tamaqtyń belgilengen tártipte berilgenin, aspazdardyń kúndelikti tekserýden ótetinin aıtty. Sonymen qatar, ýlanǵan jaýyngerlerdiń barlyǵy bir bólimsheden emes ekeni jetkizildi.
Ýlaný saldarynyń neden bolǵanyn tap basyp aıtý ońaı emes. Eger tamaqtan ýlansa, onda tutas áskerı bólimniń aýrýǵa ushyraýy múmkin edi. Aýyz sýdan sebep izdeseńiz, onda áskerı bólim ornalasqan Qyzyljarma aýylynyń halqy da mundaı oqys oqıǵadan shet qalmaýy kerek-tin. Sondyqtan mamandardyń naqty saraptamasyn kútkennen basqa laj bolmaı tur. Bastysy, budan basqa ýlanǵan sarbazdar men aýyl turǵyndary joq.
P.S. Bet qattalyp jatqanda IIM baspasóz qyzmetinen mynadaı aqparat kelip tústi. Aýrýdyń sebebi, bólim aýmaǵyna qalalyq sý qubyry toraby arqyly keletin sýdyń sanıtarlyq normalaryna sáıkes kelmeýinen bolǵan. Osyǵan baılanysty qalalyq garnızon áskerı prokýrory «Gorvodokanal» AQ-na qatysty qoldanystaǵy zańnamaǵa sáıkes is júrgizý sheshimin qabyldaý máselesin qarastyrýda.
Erjan BAITILES,
«Egemen Qazaqstan».
QYZYLORDA.