«Qarýly kúshterde árbir ofıser men sarbazdyń kásibı biliktiligi, moraldyq-jaýyngerlik rýhy joǵary deńgeıde bolýy kerek». Bul jóninde Ortalyq kommýnıkasııalar qyzmeti alańynda ótken brıfıngte Qorǵanys mınıstriniń orynbasary, general-leıtenant Sultan Kamaletdınov málimdedi.
S.Kamaletdınovtiń aıtýynsha, qazirgi tańda kadrlyq áleýetti arttyrý maqsatynda áskerı bilim berý júıesin damytý jáne kadr saıasatyn jetildirý is-sharalary qabyldanýda. Bul is-sharalardyń túpki maqsatynda áskerı qyzmetshilerdiń kásibı quzyretin keńeıtý, laıyqty joǵarylatý jáne ashyqtyq qaǵıdasymen olardyń mansaptyq ósýin qamtamasyz etý jatyr.
«Osyǵan oraı Qarýly kúshterdegi kadr saıasatynyń 2027 jylǵa deıingi tujyrymdamasy ázirlendi. Bul maqsatta «Jas Ulan» mektepteri, áskerı kolledjder, úsh áskerı joǵary oqý orny jáne Ulttyq qorǵanys ýnıversıteti áskerı kadrlar daıarlaýda úsh deńgeıli júıemen qyzmet etedi. Odan ózge, áskerı qyzmetshilerdiń kýrstyq daıyndyqtan ótýi de qamtylǵan. Neǵurlym tapshy mamandyqtar, sondaı-aq qajetti mamandyqtar boıynsha daıarlyq sheteldiń jetekshi áskerı oqý oryndarynda uıymdastyrylǵan», dedi Qorǵanys mınıstriniń orynbasary.
Ol sondaı-aq Memleket basshysynyń tapsyrmasy boıynsha merzimdi áskerı qyzmettiń bedelin arttyrý jóninde birqatar bastama pysyqtalyp jatqanyn da aıtty. Máselen, 2007 jyldan bastap BUU-nyń Nepal, Batys Sahara, Kot-d'Ivýar jáne Lıvandaǵy mıssııalaryna 500-den astam qazaqstandyq áskerı qyzmetshi qatysqan. Sonymen qatar 1992-2001 jyldar aralyǵynda Qarýly Kúshterdiń, basqa da áskerler men áskerı quralymdardyń 9 myńnan astam áskerı qyzmetshisi Tájik-Aýǵan ýchaskesinde TMD-nyń syrtqy shekarasyn kúzetýdi kúsheıtý mindetin oryndady. 2003 jylǵy tamyzdan 2008 jylǵy qazanǵa deıin qazaqstandyq «Qazbat» batalonynyń ınjenerlik-saperlik jasaǵy quramynda 300-den astam áskerı qyzmetshi Irakta mıssııasyn oryndady. S.Kamaletdınovtiń málimdeýinshe, Qazaqstan qazaqstandyq bitimgerler úshin qosymsha kvotalar alýǵa, eldiń bitimgershilik áleýetin nyǵaıtýǵa jáne BUU bitimgershilik operasııalaryna qatysý geografııasyn keńeıtýge múddeli.
«Áskerı qyzmetshilerge merzimdi qyzmet ótkerý kezeńinde «kredıttik demalystar», kommýnaldyq qyzmetterge aqy tóleýde sarbazdar otbasylaryna jeńildikter berý usynylady. О́zge de usynystar bilim berý sektorynda jeńildikter berýge qatysty bolyp otyr. Merzimdi áskerı boryshyn ótep júrgen sarbazdardyń ekonomıkanyń naqty sektorynda suranysqa ıe jumysshy mamandyqtaryn meńgerip shyǵýy jónindegi jumystar jalǵasýda. Sondaı-aq «tegin tehnıkalyq jáne kásiptik bilim berý» jobasyn iske asyrý sheńberinde Qorǵanys mınıstrligi búginde eńbek naryǵynda suranysqa ıe 16 mamandyq daıarlaıtynyn atap ótken jón. Sonymen qatar Memleket basshysy «QR keıbir zańnamalyq aktilerine áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha ózgerister men tolyqtyrýlar engizý týraly» Zańǵa qol qoıdy. Bul ózgerister áskerı qyzmetshiler men Arnaıy memlekettik organdar qyzmetkerleriniń áleýmettik toptamasyn jaqsartýǵa, áskerı qyzmet ótkerý máselelerin reglamentteýge baǵyttalǵan», dep atap ótti general-leıtenant.
Qazirgi ýaqytta «Azamattardy áskerı-patrıottyq tárbıeleý qaǵıdalaryn bekitý týraly» Úkimet qaýlysynyń jobasy ázirlenip, múddeli memlekettik organdarmen kelisilýde. Qujat azamattardy áskerı-patrıottyq tárbıeleý jáne memlekettiń qorǵanys qabiletin nyǵaıtý salasyna oń septigin tıgizedi.
Spıker sondaı-aq Qazaqstan Prezıdenti – Qarýly Kúshterdiń Joǵarǵy Bas qolbasshysynyń tapsyrmasy boıynsha obektilerdegi qarý-jaraq pen oq-dárilerdi qaýipsiz saqtaýdy qamtamasyz etý jumystaryna toqtaldy. Onyń aıtýynsha, «Qaýipsiz el» ulttyq jobasy aıasynda iri qoımalar men áskerı qoımalar salý, sondaı-aq saqtaý obektilerin tehnıkalyq kúzet quraldarymen jáne avtomatty órt sóndirý júıelerimen jabdyqtaý kózdelgen.
«Eń bastysy, mundaı nysandardyń qaýipsizdigine qoıylatyn talaptar men erejelerdi qatań saqtaý. Zań júzinde qoımalar aınalasynda tyıym salynǵan aımaqtar men aýdandardy qurýǵa baılanysty qatynastar rettelgen. Jergilikti atqarýshy organdardyń osy talaptardy qatań saqtaýy mańyzdy», dedi Qorǵanys mınıstriniń orynbasary.
Al Qarýly Kúshter Bas shtaby bastyǵynyń orynbasary – Qarýly Kúshter Bas shtaby Tárbıe jáne ıdeologııalyq jumys departamentiniń basshysy, general-maıor Serik Borambaev brıfıng barysynda jyl basynan beri ótkizilip kele jatqan Qazaqstan Qarýly Kúshteriniń 30 jyldyǵy jáne Uly Otan soǵysyndaǵy Jeńistiń 77 jyldyǵyna arnalǵan is-sharalarǵa keńinen toqtaldy.