Qazaq tarıhyndaǵy kórnekti tulǵalardyń biri Máshhúr Júsip Kópeevtiń murasy jaıly az aıtylyp júrgen joq. Biz bilmeıtin shyǵarmalary da bar eken. Oblys ortalyǵyndaǵy Toraıǵyrov ýnıversıtetinde ótken «Máshhúr Júsiptiń tarıhı murasy men qoǵamnyń rýhanı damýy» atty halyqaralyq ǵylymı-tájirıbelik konferensııada Máshekeńniń buǵan deıin jarııa bolmaǵan shyǵarmalary úsh tomdyq bolyp shyǵatyny súıinshilendi.
Atalǵan bilim ordasynda 2004 jyldan beri ǵylymı-tájirıbelik ortalyq jumysyn jalǵastyrýda. «Máshhúrtaný» páni de engizilgen. Osy ýaqytqa deıin M.J.Kópeevtiń shyǵarmalary men ensıklopedııalarynyń 20 tomdyǵy jaryq kórdi. Balalarǵa arnalǵan ıllıýstrasııalyq áńgimeler jınaǵy da oqyrmanǵa jol tartty. Qazirgi ýaqytta orys tilindegi úsh tomdyq ázirlenip jatyr eken. Onyń quramynda buǵan deıin jarııa bolmaǵan shyǵarmalary engizilmek.
R.B.Súleımenov atyndaǵy Shyǵystaný ınstıtýty Tarıhı materıaldardy zertteý respýblıkalyq aqparattyq ortalyǵynyń dırektory Merýert Ábýseıitova Máshekeń tarıhty shejire arqyly jetkizgenin atap ótti. «Máshhúr Júsiptiń jazba dástúri biregeı ári ózge aýyzsha tarıh jınaýshylaryna uqsamaıdy. Ol «dala tarıhy» baǵytynyń negizin qalaýshy», dedi tarıh ǵylymdarynyń doktory.
Bilim jáne ǵylym mınıstrligi janyndaǵy Dintaný, saıasattaný jáne fılosofııa ınstıtýtynyń bas ǵylymı qyzmetkeri Aıajan Saǵıqyzynyń aıtýynsha, Máshhúr Júsiptiń murasy rýhanı bolashaqqa baǵyttaıdy. «Oıshyldyń murasy ár adam óz halqyn, dástúrin, urpaqtaryn qurmettep, súıip ómir súrý kerek deıdi. Bul ómirlik qaǵıdattar adam turmysynyń maǵynasyn anyqtaýǵa kómektesedi. Biraq Máshhúr Júsiptiń negizgi ıdeıasy bolashaqqa aparar jol týǵan jer, adamdarǵa degen súıispenshilik arqyly jetedi degen pikirge saıady», deıdi fılosofııa ǵylymdarynyń doktory.
Pavlodar oblysy